Maayo nga relasyon tali sa Kagamhanan sa Lalawigan sa Sugbo ug ubang mga local government unit gustong palig-unon ni Department of the Interior and Local Government (DILG) Secretary Benjamin Abalos Jr.
Kini maoy usa sa katuyoan sa pagbisita ni Abalos sa Sugbo ug sa Kapitolyo diin siya giabi-abi ni Cebu Governor Gwendolyn Garcia sa Hulyo 15, 2022.
Atol sa pakighinabi sa mga tigbalita, gibutyag ni Abalos nga importante alang kaniya ang maayong relasyon ug kalinaw sa lokal nga mga opisyal alang sa mas hapsay nga pagpatuman sa mga lagda sa kagamhanan.
“Governance in Cebu is something else because what is important for us really, in order for us to have great projects, peace and order is always a factor. So, I want to make sure of that,” matod ni Abalos sa interbyu sa mga tigbalita.
Dugang niya nga gikinahanglan usab ang konsultasyon sa mga local chief exeutives aron magkahiusa sa mga solusyon ug lagda una kini ipatuman.
“What is important is the consultation with the national and the local government that is important. That should always be the case because the strength of our country, when it comes to governance, is also always not only with the President, but also with our local officials,” dugang niya.
NALIPAY
Ang gobernador, sa iyang bahin, nakauyon sa pamaagi ni Abalos, ilabi na sa planong pagkonsulta daan sa mga LGU alang sa mas hapsay nga pagpatuman sa mga lagda.
“He honors Cebu and the Cebuanos but doing this, it is like a breath of fresh air. Makaginhawa ba gyud tawn ta,” matod ni Garcia sa interbyu sa mga tigbalita atol sa pagbisita ni Abalos kaniya.
“Because as I have heard from the Secretary himself, we need to work together, National Government and Local Government. That way we can hope to achieve great things ahead,” dugang niya.
Gipasalig hinuon ni Garcia ang iyang suporta sa mga lagda sa Nasudnong Kagamhanan.
“We are here naman on the ground ready to support the agenda of the National Government even as we are now confident that local government units will also be given the due courtesy and regard as local government units and local chief executives that have responsibility to our own constituents,” matod ni Garcia.
Sa hinapos sa pamunoan ni kanhi Presidente Rodrigo Duterte, si Garcia ug kanhi DILG secretary Eduardo Año nagkasungi kalabot sa paghatag ni Garcia ug sa Provincial Board sa kagawasan sa mga lumolupyo sa pagsul-ob og face mask sa bukas nga mga dapit.
Si Garcia niluwat og executive order nga gisuportahan og ordinansa sa Provincial Board.
Gusto ni Año nga hugot nga ipatuman ang kanunay nga pagsul-ob sa face mask bisan asang dapit.
Apan ang gobernador nipasabot nga dunay gahum ang LGU sa pagpatuman og mga lagda base sa Local Government Code.