Nag-viral ang video usa ka motorcycle rider nga nagpa-wheelie sa karsada, apan natumba. Daghang netizens ang nakasaway sa rider nga usa diay ka pulis. Ang iya man gung gibuhat di haum kay ang karsada di dapit alang sa pag exhibition.
Gawas nga kuyaw kini sa disgrasya ug makaangin pa sa ubang mga motorista, gidili usab kini sa balaud sa trapiko. Busa gipahamtangan siya og silot sa Land Transportation Office (LTO) ubos ni Regional Director Victor Caindec.
Kanang two-wheeled exhibition di lang ni sa mga tigmotorsiklo, mas daghan ni sa mga tigbiseklita. Di man gyud kalikayan nga dunay mga tawo nga gustong mopakita sa ilang abilidad ngadto sa uban.
Mao sab ni ang among problema sa Tindak Bisdak Folding Bike Society kon mag night ride na mi. Dunay mga nag BMX ug mountain bike nga ganahan anang pa wheelie ug uban pang bike exhibitions. Kay nabalaka mi nga madisgrasya, amoang gipangbadlong. Daghan nila ang nangluod.
Bisan sa night ride sa Habagat matag Earth Hour, problema gihapon ni kay duna gyuy mang exhibition nga nagbiseklita.
Di unta ni angay buhaton kay ang karsada kuyaw kaayo alang ning mga buhata.
ORDINANSA
Wa ko masayod kon gilakip ba sa mga ordinansa sa mga siyudad sa isla sa Sugbo, labina sa mga siyudad ug dagkong mga lungsod sa Metro Cebu, ang pagdili sa mga exhibition sa biseklita ug uban pang mga vehicle sa dan.
Kon wa pa kini nabutang, mas maayong isukip ni nga probisyon, labina karon nga nagkadaghan ang mga nagbiseklita sa karsada kay nihimo sa biking nga kalingawan ug paagi sa paugnat sa kusog.
Kinahanglan ning kontrolahon samtang sayo pa kay kon mapasagdan, basin sa duol nga umaabot mosiaw ni.
Apan di baya sab mabasol completely ang bikers nga naggamit sa karsada nga exhibition area kay wa man say mga proyekto ang kagamhanan alang sa komunidad sa bikers. Akong pasabot kanang mga pasilidad nga mahimong makapahigayon ka sa extreme biking ug uban pa. Lahi sa ubang mga nasod nga naa.
Sama ra sab ni sa skate boarders nga naglisod sa pagbansay sa ilang skills. Sa pagkakaron, ang Lapu-Lapu City ra ang naa ani nga pasilidad, but ambot kon naatiman ba ni Mayor Junard Chan.
Si Talisay City Mayor Samsam Gullas nagpadesinyo og skateboarding area sa siyudad. Sa akong tan-aw mas maanindot ang Talisay kay ang gikonsulta niini involved man sa sports.
SUPORTA
Ang kani nga matang sa sports, labina sa BMX ug MTB, dunay mga kahigayunan nga mo-excel ta. Mas dako ang purohan sa BMX kay mas sayon ang paghimo og pasilidad nga mapraktisan kay sa downhill sa MTB nga nagkinahanglan og dakong area.
Sa downhill ug cross country, kaya kaayo ni sa Dakbayan sa Danao tungod kay ang mga Durano hilig kaayo sa biseklita. Gani, ang miaging national championship sa cross country sa mountain bike sa bukid sa siyudad gipahigayon.
Hinaut nga ang akong higalang pangu sa Sugbo Bike Lanes Board moduso usab niini nga proyekto. Segurado ning makaengganyo sa younger generation sa pagbiseklita. Hinaut nga makadawat ni og suporta.