Tanghaga pa sa kapulisan sa Mambaling Police Station sa Cebu City Police Office (CCPO) ang motibo sa pagpatay sa usa ka babayeng giingong durugista sa Sabado sa kaadlawon, Hulyo 16, 2022, bisan kon nailhan na nila ang gikatahapang killer.
Ang biktima nga gihulagway sa kapulisan nga notadong drug personality mao si Jessa Mae dela Cruz Bitoon, alyas Negra, kinsa dunay mga samad pinusilan sa iyang lawas.
Matod ni Police Major Jonathan Beethoven Taneo, hepe sa Mambaling Police Station, nga nakadawat sila og tawag sa telepuno labot sa pagpamusil sa sityo Bayotan, Brgy. Duljo Fatima.
Sa ilang pag-abot, nagbuy-od na si Bitoon nga patay na.
Ilang nasayran gikan sa mga saksi nga naglakaw si Bitoon sa dapit dihang gipusil sa suspek nga giila lang sa ngan nga Jeffrey.
Namatay diha-diha si Bitoon sa mga samad pinusilan samtang ang suspek yano rang nilakaw.
Una nilang susihon kon kini may kalabutan ba sa illegal drugs.
Ila usab nga susihon ang background ni Jeffrey, kon wa ba usab kini nalambigit sa illegal drugs.
Matod ni Taneo nga ang pagpamusil nahitabo human sa ilang foot patrol sa dapit.
Si Taneo nibutyag nga kanunay nilang gihimo ang foot patrol sa mga dapit ubos sa ilang jurisdiction aron maminusan ang mga krimen.
CONSOLACION
Giingong kanhi player sa ilegal nga drugas sa dakbayan sa Toledo nga niundang tungod sa hugot nga kampanya batok sa illegal nga drugas sa miaging administrasyong Duterte, nasikop niadtong Biyernes, Hulyo 15, 2022 sa lungsod sa Consolacion.
Ubos sa pagdumala ni Police Colonel Elmer Lim, kasamtangang hepe sa Cebu Police Provincial Office (CPPO), nasakmit sa operasyon ang labing minos usa ka kilo sa gituohang shabu.
Si Police Major Joey Bicoy, pangu sa Provincial Intelligence Unit (PIU) sa CPPO, niingon nga kapin sa usa ka kilo ang ilang nasakmit gikan ni Wennie Delos Santos Chow, 63, taga Barangay Subayon, dakbayan sa Toledo.
Ang operasyon nga gipahigayon sa Brgy. Poblacion Oriental, Consolacion, amihanang Sugbo, gisalmutan usab sa Regional Intelligence Division (RID) 7, Regional Police Drug Enforcement Unit (RPDEU) 7, Provincial Mobile Force Company (PMFC) ug Consolacion Police Station.
Si Chow nasakmitan og drugas nga motimbang og kapin sa usa ka kilo nga dunay street drug price nga P7.4 milyunes.
Matud ni Bicoy nga kapin sa usa ka semana ang giumol nga pagsubay sa iyang mga tawo kang Chow.
Sa ilang negusasyon, nisugot ra kini nga adto sila magtagbo sa pulis nga poseur buyer sa lungsod sa Consolacion.
Natigayon ang transaksyon pinaagi sa text ug tawag.
Ilang nasayran nga si Chow di mo-transact og illegal drugs sa Toledo, inay sa dakbayan sa Sugbo diin siya nag-abang og boarding house.
“Amo pa gyud ning subayon lagi asa ang boarding house ani kay dili motug-an unya adto man niya sa Cebu City. Tagbuon ang mohatag sa drugas dayon adto siya mag pundo sa iyang boarding house. Human nga mahatud, magbilin siya para dalhon didto sa Toledo,” matod ni Bicoy.
Siya niingon nga dinagko ang tranksyon ni Chow sa illegal drugs.
“Actually dili ni siya mohatag og ginagmay lang. 100 grams pataas ang iyang transaksyon ani niya unya walay pili sa paghatag. Siguro basta mahurot lang ang iyang item, maoy iyang huna-huna,” dugang ni Bicoy.
Ilang nasayran nga ang agawon ni Chow naa sud sa prisohan samtang ang mga sakop niini mao nay mo-contact kaniya alang sa pag-deliver sa shabu.
Si Chow naa sa top ten priority list sa drug personalities sa lalawigan sa Sugbo.