Mipabuhagay og 42 puntos si Lebron James aron tabangan ang MMV Cheaters sa paglupig sa Black Pearl Elite, 104-102, sa Drew League kagahapon didto sa California, Estados Unidos.
Milangkat pud og 16 ka rebounds si James sa iyang unang duwa sa Drew League sukad niadtong tuig 2011.
Ang 37-anyos nga Los Angeles Lakers superstar gidala ni Chicago Bulls forward DeMar Derozan aron moduwa sa Drew League, usa ka pro-am basketball league nga ipahigayon matag summer didto sa Los Angeles, California.
Si Derozan wa pud magpaulahi sa iyang 30 puntos ug 14 rebounds.
Nag-viral ang maong duwa sa social media kay mao man kini ang unang higayon nga miduwa si James sa publiko sulod sa tulo ka buwan human ang 2021-2022 National Basketball Association (NBA) regular season.
Wa makaduwa si James sa uwahing pito sa walo ka schedules sa Lakers sa milabay nga regular season tungod sa left ankle sprain. Giklaro ni James nga naka-recover na siya sa maong injury.
“I’m 100 percent healthy,” tubag ni James sa ESPN.
Managlahi ang reaksiyon sa social media sa maong performance ni James.
Matod ni Twitter user @U_Serf nga di makakurat ang maong performance kay ang ilang kontra sa Drew League average players lang.
Lain pud ang opinyon ni @Slatt_theRuler kay matod niya, di pud pipitsogin ang mga manuwa sa Drew League kay usa kini ka sikat nga liga nga gidayo og mga kusgan nga basketball player.
Sa maong duwa, si Lebron adunay 18-for-36 shooting clip samtang si Derozan mikuha og 9-for-23 shooting.
Usa ka ilado nga liga ang Drew League sa California og dayohon kini sa ubang NBA players, former pros ug collegiate players.