8 'sakop' sa CIDG gikasohan

NAG-ATUBANG og mga kaso ang upat ka mga sakop sa Criminal Investigation and Detection Group (CIDG) ug lain pang upat ka kauban sa City Prosecutor sa Siyudad sa Tagum.

Giingon nga ang nagpasaka kanila og kaso mao ang negusyante nga si Joel Quilas Betongga, 37, molupyo sa Purok 1, Barangay La Filipina sa nahisgutang siyudad.

Gipasaka sa negusyante ang mga kasong kalapasan sa Domicile, Illegal Arrest, Incriminatory Machination ug Robbery ngadto sa buhatan sa Prosecutor niadtong Hulyo 13, 2022 alas 2:38 sa hapon.

Base sa gipirmahan nga affidavit, gisaysay ni Betongga nga siya nanag-iya og sari-sari store ug kini maoy tinubdan sa inadlaw nilang panginahanglan nga naa lang atubangan sa ilang panimalay sa nahisgutang dapit.

Apan giingon nga ang halin o kita sa tindahan di pa paigo sa inadlaw nga panginahanglan hinungdan nga mi-sideline sila og laing negusyo nga mao ang LPG-filled Butane Canister delivery.

Ang maong negusyo giingong gihanyag sa suplayer nga si alyas Jun-Jun nga giingong usa sa mga awtorisado sa Department of Energy (DOE) sa pagpang-apud-apod og LPG-filled Butane Canister nga ginganla'g "Tripler" gikan sa siyudad sa Tagum.

Sumala pa nga ginapalit ni Betongga ang mga Butane Canister gikan sa Tripler ug i-deliver sab sa laing mga lungsod sa Mabini ug Maco sa probinsiya sa Davao de Oro gamit ang Suzuki Scram Multicab.

Apan gibutyag nga niadtong Hulyo 4, 2022, sa alas 5:10 sa buntag, niabot sa tindahan ni Betongga ang gibana-banang walo ka mga lalaki nga nagsakay og kolor puti nga van ug laing duha nga nagsakay sa single nga motorsiklo nga giingong armado sa tag-as ug mugbo nga kalibre sa armas ug nagpaila nga mga personahe sa CIDG-Tagum kon diin ang usa kanila nailhan nga si alyas Momar gumikan kay kini ang kanunay gihisgutan sa ilang mga drayber nga naga-deliver og Butane nga si alyas Joseph ug alyas Richard.

Giingnan matud pa si Betongga nga "Illegal ni inyong baligya, asa inyong permit sa DOE?"

Mosulay pa unta og tawag si Betongga sa iyang supplier aron mangita og clearance apan giingon nga gikuha sa usa sa mga lalaki ang iyang selpon ug giingnan nga "Cooperate na lang para di ni magdako, uban ta sa opisina."

Tungod niini, niduol ang asawa ni Betongga ug nangayo og warrant sa mga nagpaila nga sakop sa CIDG. Apan giingnan hinuon siya og, "Wala'y warrant-warrant istoryahunon kaayo ni."

Dayon matud pa, gipangkarga ang mga Butane Canister nga gibana-banang mokantidad og P40,000 ngadto sa Suzuki Multicab ni Betongga ug gimandoan siya sa usa sa mga lalaki nga drayban kini padulong sa opisina sa CIDG sa compound sa Davao del Norte Provincial Police Office sa Visayan Village, Tagum City ug gi-eskortan kini sa van ug laing duha ka motorsiklo.

Apan giingong pag-abot sa mingaw nga lugar haduol sa sementeryo sa Brgy. La-Filipina, gimandoan si Betongga sa pagpahunong ug gikuhaa'g hulagway ingon man video apil ang multicab nga kargado sa Butane Canister, dayong giingnan, "Naa kay katungod magpakahilom, naa kay katungod mokuha og abogado," ug dayong gidala ngadto sa ilang buhatan.

Pag-abot sa buhatan sa CIDG, alas 6:30 sa buntag sa maong adlaw, gikuhaan sab siya og hulagway, ingon man finger prints ug gipapirma sa giingong imbentaryo sa nakuhang mga butang gikan kaniya.

Alas 9:00 sa buntag dihang miapas sa opisina ang asawa ni Betongga ug giingong gimandoan nga permahan ang mao niyang release paper ug dayon sila gibuhian.

Sa pagkasunod adlaw, giingong mihimo og follow up si Betongga ngadto sa opisina sa City Prosecutor kabahin sa posibleng kaso nga gipasaka sa CIDG batok kaniya ug nag- follow up sab kini sa mismong opisina sa CIDG apan giingnan kini sa usa ka opisyal nga nailhan sa pangalang Richard nga gipaabot pa ang clearance gikan sa DOE ug paabuton na lang ang "summon" human ma-file ang kaso.

Tinguha ni Betongga nga makuha ang iyang sakyanan nga tua sa kustodiya sa CIDG hinungdan nga mihimo siya'g affidavit ug mipasaka og pormal nga kaso batok sa upat ka mga sakop sa CIDG ug sa laing upat ka mga kaubanan niini human nga naamgohan nga ang gihimo sa mga nahisgutan dili makatarunganon labi na ang gihimong pag-aresto kaniya.

Sa paghagpat ning maong balita, gipaningkamutan ning tigbalita nga makuha ang bahin sa mga sakop sa CIDG nga gipasakaan og kaso.