Nasakpan sa asawa ang iyang bana nga naligo uban sa ilang maid. Suko kaayo ang asawa. Asawa: “Nasakpan ta gyud mo.” Bana: “Kalma lang, Love. Nagdungan mi’g kaligo ni Inday kay nagdaginot mi sa tubig. Basa ra gud sa Superbalita, magpaumento na sab ang MCWD.”
Mao nay plano sa Metropolitan Cebu Water District (MCWD), matod pa sa ilang board chairman, Jose “Joey” Daluz III. Umentohan ang bayranan sa tubig og 60 porsiyento sa Hulyo sa 2023 ug laing 10 porsyento sa mosunod nga tuig 2024. Balig 70 porsiyento tanan.
Apektado niini ang mga konsumidor sa tubig nga gisilbihan sa MCWD sa mga siyudad sa Cebu, Mandaue, Lapu-Lapu ug Talisay ug sa mga lungsod sa Consolacion, Liloan, Compostela ug Cordova. Way apil kadtong hangtod karon wa pay water connection.
Kon madayon ang umento sa bayranan sa tubig, gikan sa P15.20 matag cubic meter sa unang napulo ka cubic meter nga makonsumo. Mosaka kini ngadto sa P25.05 kada cubic meter. Ang umento P9.85 matag cubic meter sugod sa Hulyo 2023.
Ang average household nga konektado sa MCWD mokonsumo og 21 ka cubic meters matag buwan ug magbayad og P399.80 apan moabot kini og P430.99 pun-an sa P91.19 nga franchise tax, power cost adjustment (PCA) ug purchased water adjustment (PWA).
Sa umento, mosaka kini ngadto sa P543.68 ug ngadto sa P561.90 apil ang franchise tax nga P10.87 ug PWA nga P7.35. Ang PCA apil na sa umento. Sa 2024, moabot kini og P617.36. Apan ang water bill sa mokonsumo lang og pito ka cubic meter kada buwan, mosaka ra ngadto sa P250.21 gikan sa P188.17 sa pagkakaron.
Gisupak ni Cebu City Mayor Michael Rama ang giplanong umento sa bayranan sa tubig sa MCWD kay 75 porsiyento sa mga konsumidor sa MCWD mga residente sa siyudad sa Sugbo. Matod niya, kalit kini ug di makatarunganon kay wa pa kita hingpit nga makabangon gikan sa epekto sa Covid-19 pandemic ug sa mga katalagman nga niagi.
Kon nakahinumdom mo, way agas sa tubig human sa bagyong Odette kay way kuryente. Ang nakanindot sa MCWD kay temprano kaayo sila sa pagpadala og water bill bisan way agas sa gripo. Pakapinan pa og notice of disconnection.