Usa ka bahin sa footbridge sa Mananga River nga nagdugtong sa Barangay Lawaan 3 ug Barangay Lagtang sa dakbayan sa Talisay naputol hinungdan sa pagkahulog sa duha ka mga batang babaye ug lalaki nga nagpangidaron og 12 kagahapon sa hapon, Hulyo 17, 2022.

Si Patrolman Kimjohn Amolo, desk officer sa Talisay City Police Station, nagkanayon nga ang duha ka mga bata nangaangol human naputol ang kable niini ug natagak sa suba nga nagbaha.

Dugang ni Amolo, dali nga gidala ang duha ka mga bata sa mga miresponde nga mga sakop sa Emergency Medical Services (EMS) sa Talisay City Disaster Risk Reduction and Management Personnel.

Si Lawaan 3 Barangay Captain Frederick ‘Reggie’ Marababol nibutyag nga ang babaye nga bata kay apo sa usa sa iyang mga sakop nga Barangay Health Worker (BHW) samtang ang lalaki nga bata kay taga Barangay Lagtang.

Matod ni Marababol, ang babaye nga 12 anyos gikan sa ilang barangay dihang misaka ang tubig sa Sityo Cadicay sa Lawaan 3 ug niadto kini aron motan-aw sa sitwasyon apan wala damha nga dunay kable sa taytayan ang naputol.

Dugang niya, ang maong footbridge temporaryong gisirad-an tungod sa kasamtangang kondisyon nga gubaon ug usa na lang ka kable ang nagkupot niini.

Apan wala mabantayi ang pagtungtong sa mga bata sa footbridge.

Si Marababol nidugang nga nagkasinabot na sila sa kapitan sa Barangay Lagtang nga pabantayan og barangay tanod ang matag habig nga agianan nga footbridge.

Gikataho nga ang maong footbridge karaan na ug nagpangidaron og dili mominos sa duha ka dekada.

Karong adlawa, Hulyo 18, 2022, bisitahan sa mga sakop sa Engineering Department sa Talisay City Hall ang maong naputol nga taytayan aron matrabaho dayon sa labing daling panahon.