Mosamot ang pagmug-ot niadtong mga tawo nga nangandam na alang sa piniliay sa barangay ug Sangguniang Kabataan (SK) nga gikatakda na unta karong Disyembre ning tuiga. Dako na usab og gasto ang uban nga buot mokandidato kay daghan na silang mga kalihokan ug programa nga gipahigayon isip pangandam sa eleksyon.

Apan daghan nang mga sakop sa Kongreso ang nisang-at og balaudnon dihang misugod ang ilang gimbuhaton niadtong hapon sa Hunyo 30 nga ioktaba lang ang una ang piniliay sa barangay ug SK karong tuiga. Apil si Kong. Rachel Marguerite “Cutie” del Mar sa Cebu City north district sa mga unang kongresista nga ningsang-at og balaudnon nga di lang una ipahigayon ang bugnong lugaynon sa barangay ug SK.

Si Senador Francis “Chiz” Escudero nisang-at usab og balaodnon sa Senado nga supak alang sa piniliay sa barangay ug SK. Buot ni Escudero nga sa ikaduhang Lunes sa Mayo sunod tuig na ang piniliay ug di ipahigayon karong Disyembre 5 ning tuiga. Nitataw ang senador nga ang P8.44 bilyones nga pundo nga gigahin niini mas maayong gamiton alang sa problema nga atong gisagubang sa Covid 19 pandemic, pagsaka sa presyo sa petrolyo, inflation ug padayong kakabus.

Ang gihisgutan nga pundo ni Escudero dako na kaayo og matabang ning gisagubang nga mga problema karon sa nasod, ilabi na nga nagsangkiig pa ang atong ekonomiya nunot sa nagpadayon pa nga pandemya. Gawas niini, bag-ohay pa usab kitang nabahinbahin sa Mayo 9 nga piniliay. Gani, lab-as pa kaayo sa uban ang ilang nagkaaslom nga relasyon nga hangtod ning higayona wa pa sila magkabalik, ilabi na kadtong usa ra ka pamilya.

Mosamot ang kaaslom sa ilang relasyon kon dugangan pa usab sa laing bugnong lugaynon karong Disyembre. Ang eleksyon sa barangay ug SK personal nga bugno nga bisan ang pamilya mag-atbang pa kay lagi lahi man kon naa kay huptan nga gahom ilabi kon naa sa barangay.

Sa akong obserbasyon, daghang mga kongresista ug senador ang mosuporta nga di madayon ang eleksyon tungod kay nibalit-ad ang ilang bulsa sa bag-ohay lang natapos nga eleksyon.

Asa man sila kuha’g ilang salapi nga mao pa may pagsugod nila sa ilang katungdanan? Gawas niadtong mga pulitiko nga wa magsalig sa panguwarta sa gobyerno kay aduna may negusyo nga kakuhaan og pundo. (josephelvirtubilan@gmail.com)