Roldan: Kamatayon, lana ug tubig

DUNAY nagkanayon nga duha ra daw ang segurado sa kinabuhi. Ang una ang bayad sa buhis, ug ang ikaduha mao ang kaminyuon.

Apan para kanako, aduna pay tulo. Kini ang kamatayon, ikaduha ang pagsaka sa presyo sa lana ug ang katapusan kay walay tubig.

Karong bag-o lang, nagsubo ang mga sakop sa media tungod sa kamatayon ni Sir Antonio "Tony" Ajero nga maoy publisher/editor-in-chief sa EDGE Davao. Si Tony naila nga lig-ong haligi sa media dinhi sa Davao ug walay bisan kinsa nga wala nakaila kaniya.

Daghan na kaayo siyang naagian sa larangan sa panulat ug gani nahimo na siyang institusyon.

Ang Nota bene niyukbo sa pagpanaw sa atong higala nga atoa na sa laing kalibutan. Basin didto sa langit na niya makaplagan ang kamatuoran sa tanang talinghaga sa kalibutan nga buot niyang sayron ug isulat samtang ania pa siya dinhi ning kalibutan.

Ubay-ubay sab nga kaila nako nga namatay sa niaging mga semana. Sa pipila ka adlaw namatay sab si Michael Canarias nga kumpare nako ug siyempre si bai Bernie ug akong inahan. Tungod kay di man nato matagnaan ang kamatayon, kinahanglang mangandam kita kanunay kay basin kita na sab ang tawagon sa dili madugay.

Ang ikaduhang segurado para kanako mao ang sunod-sunod nga pagsaka sa presyo sa lana. Gikan sa Marso 2022, kadaghan na kini misaka sama sa presyo sa krudo nga gikan sa P58 matag litro ngadto sa sobra P80 karong semanaha.

Gikan sa Marso 28 hangtud sa Hulyo 4, 2022, ang "average increase" sa krudo kay P77.90 samtang moabot sab og P106.00 ang presyo sa pagkalibutanong merkado.

Pastilan, wa nato damha nga moabot niini kataas ang presyo nga basin moabot pa'g P100 matag litro kung magpadayon kining giyera sa Ukraine ug Russia ug kagubot sa pipila ka nasud sa Middle East.

Mao gihapon kini nga problema nga gihambin sa katawhan sa miaging mga tuig ug sa umaabot pa nga katuigan hangtud nga kita na mismo ang momina sa atong lana dinhi sa Pilipinas.

Ang Malampaya sa Palawan di na sa Pilipinas busa kinahanglang mokalot kita sa ubang lugar nga naay lana.

Ang ikatulo kay ang kakulang sa tubig. Ambot kung nganong mawala gihapon ang tubig sa pipila ka lugar sa Davao.Ang ubang subdivision sab nahutdan og tubig sama sa Deca -Indangan nga di pa mainom ang tubig, maputol pa gyud ang serbisyo nga perwisyo sa katawhan.

Unta mahuman na kining Davao City Bulk Water Project sa DCWD ug sa Apo Agua aron mabutangan na'g linya ang tanang subdivision nga may sariling patubig apan dili klaro nga serbisyo. Ang gusto sa tawo kanang tubig nga mainom kay nagkamahal sab karon ang "mineral water" nga ginapalit.

Kaniadto walay ginalon nga gibaligya dinhi sa Davao kay lagi lamian man ang tubig gikan sa Dumoy apan karon wa nay moinom gikan direkta sa gripo. Ambot pud kung mineral water ba ning tanan o gikan ra pud sa gripo?

Sa katapusan, condolence na lang sa namatyan, naglagot sa pagsaka sa lana ug sa nawad-an og tubig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph