GIBUTYAG ni Davao City Health Office (CHO) head Dr. Ashley Lopez nga dunay duha ka posibleng hinungdan sa diarrhea outbreak sa Toril, food poisoning o water contamination.
Sa niaging semana, dunay mga taho sa social media nga diarrhea outbreak sa Toril ug pipila ka lugar sa habagatang porsiyon sa Davao City. Gikompirma ni Lopez ang outbreak niadtong Hulyo 17, 2022.
Sumala sa CHO, mga lugar nga dunay gitaho nga diarrhea outbreaks mao ang mga barangay sa Bato, Toril Proper, Crossing Bayabas, Lubogan, Mulig, Daliaon Plantation, ug Tungkalan, nga kabahin sa Toril A, ug Daliao North, Daliao South, Lizada Fish Port, Lizada Curvada, ug Binugao, nga kabahin sa Toril B.
"Pwede sa tubig, contaminated water, which was brought about by the expected na tag-ulan. Naa ta’y cases from areas with continuous flooding," tataw ni Lopez niadtong Hulyo 18.
Matud pa sa opisyal nga ang Davao City Water District (DCWD) naghimo na og "water sampling" ug naghuwat alang sa opisyal nga resulta.
"This was reported yesterday by one of our sanitary inspectors nga naa daw nagapamaligya og street food, tapioca gani, which could also be related to the use of water along the streets of Toril, which can also be a possible source of infection," matud niya.
Isip tubag, gimandoan sa CHO ang pagsira sa mga street food stalls sa mga naapektuhan nga lugar niadtong Dominggo, Hulyo 17, 2022 hangtud sa panahon nga makahimo na og kompirma ang buhatan base sa pagsusi nga ilang gihimo.
"Temporarily amo sang gipa-undangang pagbaligya aning mga pagkaon o mga street food because it could be a possible source of infection and nagkuha na pud me og sampling ani gahapon sa SPMC," dugang ni Lopez atol sa paghinabi uban sa Davao City Disaster Radio niadtong Hulyo 18, 2022.
Sukad alas 11:14 sa buntag, si Lopez nagsulti nga duna nay 45 kaso sa diarrhea sa Toril. Apan matud niya nga kon kini kontaminasyon sa tubig, gilauman nila dunay kapin sa gatus o libo nga mga kaso.
Base sa inisyal nga mga resulta, wala matud pay nakompirma nga kaso sa "amoebiasis."
Sulti niya nga ang pag-angkon nagsugod niadtong Hulyo 15 ug mikuyanap niadtong Hulyo 16, hinungdan nga ang Sanitary Inspectors and District Surveillance Officers (DSO) nilusad og imbestigasyon sa mga lugar sa Toril.
Samtang ang DCWD nipasalig niadtong Dominggo ngadto sa ilang mga konsumante nga ang ilang tinubdan sa tubig luwas.
Ang publiko gitambagan sab nga pagpabukal sa ilang tubig una imnon.
Nitambag sab si Lopez nga kon duna may dugang mga pangutana, mga molupyo modangop sa incident command centers nga mao ang District Health Centers sa Toril A ug Toril B.
Alang sa Toril B, ang district health center nahimutang sa atubangan sa Magsaysay Elementary School, samtang ang Toril A, ang district health center naa sa Toril Proper.
Alang sa dugang katuyoan, ang publiko mahimong mokontak sa 09302702823.
Samtang gibutyag sab ni Lopez nga base sa mando ni Mayor Baste Duterte, nakigkoordinar na sila sa Lingap Para sa Mahirap alang sa tabang sa pagpa-ospital sa "indigent" nga mga indibiduwal. (Uban sa taho sa City Information Office)