WAY nakitang foul play ang mga awtoridad sa kamatayon sa giingong teller sa Small Town Lottery (STL) kinsa giingong naghikog sulod mismo sa booth niini.

Dako na lang nga kakurat ang gibati sa wa mailhing tayador dihang maoy nisugat sa iyang panan-aw ang nagbitay nga teller sa STL sulod sa booth didto sa Purok 12, Barangay San Vicente, Siyudad sa Panabo alas 11:30 sa buntag, Lunes, Hulyo 18, 2022.

Gibutyag nga ang wa mailhing tayador miadto sa nahisgutang STL booth aron nga motaya og numero. Apan nahingangha ug wa dayon makalihok dihang maoy misugat sa iyang panan-aw ang biktima nga si Mark Joseph Cascallas, 24, ulitawo, ug molupyo sa Purok Suaybaguio, Magugpo North, Tagum City nga nagbitay gamit ang kolor itom nga panaptong giputol-putol.

Gibutyag nga wala na gidala ang biktima ngadto sa ospital sa mga sakop sa City Disaster Risk Reduction and Management Office (CDRRMO) gumikan kay nakompirma nga patay na siya.

Apan taliwala ning tanan, giawhag sa mga awtoridad ang pamilya sa biktima nga ipa-autopsy ang patay nga lawas niini.

Kung duna kamoy nasayran o kaha nakasinati mismo og depresyon ug buot nga dunay ika-istorya, ayaw pagduha-duha sa pagkontak sa 0966-351-4518/0917-899-8727 ug 0917-899-USAP alang sa Globe/TM Subscribers samtang 0908-639-2672 sa Smart/Sun/TNT Subscribers.