Excited na ba ang tanan sa Werpa Food Park 2nd Anniversary Party?
Rak en rol kay ang Cebu’s iconic pop rock band nga Cueshe ang mag-concert live atol sa ilang selebrasyon karong July 29, Biyernes, 7 p.m. isip special treat nila sa tanang Werpanatics.
Kinsa may dili maka-relate sa ilang signature hits nga nahimo nang soundtrack sa kinabuhi sa mga Pinoy sa daghang katuigan, sama sa Ulan, Borrowed Time, Back To Me, Stay, 24 Hours, Can’t Let You Go, Sorry, Pasensya Na, Bakit, ug daghan pa nga sa intro pa lang lami na kaayo i-sing-al.
Ang Cueshe gilangkoban gihapon sa orihinal nilang mga miyembro nga silang Ruben Caballero (vocals), Fritz Labrado (bass), Jovan Mabini (lead) ug sa bag-o nilang sakup nga si Cesar delos Santos (drums).
“Their songs are nostalgic which bring back high school and college memories,” paghulagway sa magtiayong Natnat ug Miña Bunyi nga maoy CEO ug founder sa Werpa nga makita atbang sa Lourdes Parish Church sa Punta Princesa sa Labangon.
Sukad gibuksan ang Werpa sa miaging tuig nipatok dayon ni sa publiko tungod kay gawas nga dako ang lugar ug high-end ang ambiance, duna silay live bands. Aduna sab silay air-conditioned room for private function sa ibabaw ug bean bags nga perfect tambayan.
“Ang Werpa bukas sa tanan mabata man o edaran ug pet-friendly pa. Maka-cater og 250 to 350 persons ug puwede ra kaayo mag-inom basta 21 pataas lang ang edad. Daghan ang nagtuo nga ang `Werpa’ binali sa `power’ apan ang tinuod gyud nga meaning ani, `Where Exciting Real Pakal Awaits!’” paambit pa ni Natnat.
“Ang pinaka-una nga Werpa Food Park natukod sa Basak San Nicolas niadtong 2018 but nahunong tungod sa pandemic. Apan wala mi lung-i sa among mga suki o sa mga Werpanatics nga sigeg pangita sa Werpa mao nga nag-open mi og balik ug mao ni karon ang Werpa sa Labangon,” asoy usab ni Miña.
Ang ticket sa concert sa Cueshe nagkantidad og P1,000 nga dunay kalakip nga libreng P200 voucher consumable sa 22 ka mga tenant nga nag-operate sa Werpa sama sa MER’s Paluto, Above Sea Level, Cebu Original Lechon Belly, Mango Mania, House of Burgers, Wing Gals, Tea-Gether, Fire bowl, Guzzles and Nibbles, Oppa Brads, J-Silog, Carl n Shem, Lamaw King, Lami-q, BQ’s, Shinobi, BOQ’s, Happy Sundae, Tea Hive, Jade of all Bakes, ug Maui’s Pizza and Shawarma.
Ang Save Session acoustic band nga mga higala sa Cueshe ang magsilbing front act sa concert.
Apan sa mga nangutana kon duna bay purohan nga mag-reunion ang Cueshe ug ang ex-vocalist nga si Jay Justiniani, daw lisud pa nang mahitabo sa pagkakaron.
“Well, we know that you guys have been wondering if we have vanished but no, we’re still here. Sa mga naghandum gihapon sa among mga kanta, daghan kaayong salamat,” matod ni Ruben dihang na-interbyu ni sa Superbalita.
Kon giunsa pag-survive sa ilang banda sa miaging duha ka dekada?
“We held on to our friendship. We fight, we argue but at the end of the day, our respect and mutual care for one another will always be there.”
Bisan sa pagligid sa panahon, ang Cueshe nagpabiling usa sa mga in demand ug paboritong OPM bands karon sa nasud.
Sa mga fans sa Cueshe, ang tickets mapalit sa Werpa admin from 11 a.m to 11 p.m. Pangitaa lang si Ms. Essel or Ms. Renneth or call #0921-2841097.