PAGKAHUMAN sa sobra duha ka tuig nga pag-undang sa Barangay Caravan sa Davao City tungod sa pandemya, gibalik na kini karon diin mas midaghan pa ang mga serbisyo nga alang sa katawhang Dabawenyo.
Hulyo 18, 2022 unang gisugdan ang caravan sa Barangay Crossing Bayabas, Toril District, atol sa ilang pagsaulog sa ika-57th Araw ng Barangay.
Ang pagbalik sa caravan gipangunahan mismo ni Davao City Mayor Sebastian "Baste" Duterte.
Si Baste maoy miatubang sa mga tawo nga nanginahanglan og tabang kinsa migahin og panahon aron nga makahimamat sab ang mga residente nga miduol kaniya.
Sa barangay caravan anaa ang tanang opisina ug representative sa matag departamento sa lokal nga kagamhanan nga mohatag og serbisyo ngadto sa katawhan ug moatiman sa ilang panginahanglan.
Pinaagi niini, mas gipaduol sa lokal nga kagamhanan ang serbisyo ngadto sa katawhan sa bisan asang hilit nga barangay ning siyudad.
Gipahibalo ang mga mosunod nga mga schedule sa mga umaabot nga barangay caravan alang karong bulana.
Sa Hulyo 25, didto kini sa Barangay Bunawan Proper, Agosto 8 sa Barangay Mandug, sa Agosto 9 sa Barangay Centro Agdao, sa Agosto 19 sa Barangay Malamba, Agosto 22 sa Barangay Los Amigos, Agosto 25 sa Barangay Salapawan, Agosto 26 sa Barangay Mapula, Agosto 29 sa Barangay Tibuloy, ug sa Agosto 30 sa Barangay Acacia.
Gipasalig sa lokal nga panggamhanan ning siyudad nga tanang barangay sa Davao dalitan sa nahisgutang serbisyo sa mosunod nga mga adlaw.