NAGPAHIGAYON niadtong Miyerkules, Hulyo 20, 2022, og lahugay ang Davao City Police Office (DCPO) sa mga station commanders niini.
Sumala sa DCPO nga dili kini nagpasabot nga hinay ang perpormans sa matag station commanders, kon di usa kini ka regular nga aktibidad sa han-ay sa kapulisan aron kahatagan og higayon ang ubang mga pulis diha sa mas taas nga tahas depende sa nakuhang ranggo niini.
Upat ka mga istasyon ang apektado sa lahugay, kini mao ang Sta Ana Police Station, San Pedro Police Station, Baliok Police Station ug ang Sasa Police Station.
Sa Sta. Ana police, ibalik isip station commander si Police Lieutenant Colonel Ronald Lao, diin iyang hulipan si Police Major Jake Goles nga ibalhin sa Sasa Police Station.
Hulipan ni Goles si Police Major Jose Rodrigo Mendoza, samtang ang mupuli kang Lao sa Mobile Patrol Unit si Police Major Mark Balbuena.
Una nang giilisan sa DCPO ang station commander sa San Pedro Police Station nga si Police Major Benkalin Baluan nga gibutang sa Tactical Operation Center (TOC).
Gibutang isip bag-ong hepe sa San Pedro Police si Police Major Romeo Mapanao nga gikan sa Baliok Police Station, samtang si Police Major Nelson Violan ang gibutang isip bag-ong station commander sa Baliok police.
Luyo niini, di matarog ang pagpakusog sa kampanya sa awtoridad sa pagpatunhay sa kahapsay ug kalinaw sa dakbayan sa Davao.