DRUG-FREE na ang Talikud Island sa Island Garden City of Samal (Igacos) sa Davao del Norte, kini subay sa gihimong deliberasyon sa awtoridad nga gipangunahan sa Philippine Drug Enforcement Agency (PDEA) Davao Region, Hulyo 20, 2022.
Subay sa report sa Police Regional Office (PRO)-Davao, upat ka mga barangay sa Talikud Island ang drug-free ug kini mao ang mga barangay sa Sta. Cruz, Dadatan, Cogon ug Linosutan.
Ang Island Garden City of Samal Police Station, uban ang City Anti-Drug Abuse Council (Cadac), Barangay Anti-Drug Abuse Council (Badac) ug mga kapitan sa barangay ug Regional Oversight Committee of Barangay Drug Clearing ang anaa sa deliberasyon sa pagdeklara sa nasampit nga mga barangay nga mahimong drug-free.
Sumala sa PDEA-Davao nga bunga kini sa paningkamot sa katawhan sa pagpaneguro nga walay mga aktibidad sa ilegal nga druga sa ilang palibot.
Tungod niini, mas paningkamotan pa sa kapulisan sa Samal Island nga daghan pang mga barangay ang madeklarang "cleared" batok sa ilegal nga druga.