Usa ka opisyal sa dakbayan sa Mandaue giila sa iyang green building advocacy, nisaad sa paghatag og dugang edukasyon sa ka importante sa pagpabilin ug pagprotektar sa bahandi sa kinaiyahan samtang nagsagop sa paspas nga kalamboan sa ekonomiya.
Si Araceli Barlam, pangulo sa Mandaue City Environment and Natural Resources Office (MCENRO), nagkanayon kagahapon, Hulyo 21, 2022, nga tumong niya ang pagtabang sa dugang katawhan nga makaamgo sa pag-amoma sa kinaiyahan samtang nihangop sa kalamboan labi na sa imprastraktura.
Si Barlam bag-ong gipasidunggan sa Philippine Green Building Council (PHILGBC), usa ka non-government organization nga natukod sa Marso 22, 2007, nga nagpalambo sa holistic o malangkubon ug market-based green building practices ug giisip nga green building rating system sa Pilipinas.
Ang green building usa ka infrastructure designed nga magpakunhod o pagwala sa negatibong epekto sa establisemento ngadto sa climate ug natural environment.
Kinahanglan ang usa ka well-planned waste management system, energy consumption, ug paghatag og gibug-aton sa kahamugaway sa mga okupante.
Si Barlam gihatagan og “Women in Green Building Leadership Award,” diin nag-ila sa usa ka babaye nga lider nga dunay adbokasiya sa kaimportante sa green buildings sulod sa business sectors ug local government units (LGUs).
Siya maoy bugtong representate gikan sa LGU, diin sagad sa finalists gikan sa private firms.
Ang award gihatag pinaagi sa virtual announcement niadtong Hulyo 15.
Si Barlam maoy morepresentar sa Pilipinas sa World Green Building Council Asia Pacific Regional Network Leadership in Green Building Awards sa Bali, Indonesia karong Nobiyembre 2022.