Human sa eleksiyon niisyu og memorandum si Mayor Mike Rama nga iyang ipaubos sa evaluation ang tanang mga empliyado sa Cebu City hall. Ang Cebu City adunay 5,000 ka job order (JO) workers, 3,600 ka casual ug 1,500 ka regular employees. Nisaad usab siya nga dili niya tangtangon ang Mayor’s Information and Liaison Office (MILO).
Gani iya pang pun-an kini’g “ovaltine.” Ubos sa iyang memo, iyang tangtangon kining mga empliyado nga : kawatan, tapulan, hugawan, intregero, pala-away, walay nahibaw-an, dili mobayad sa utang ug mobuko-buko. Niadtong Hulyo 1, iyang gituman ang iyang saad ug gitangtang ang 500 ka mga JO ug casual. Pun-an pa kini niya og mga 3,000 ka buok.
Apan aniay pro-Rama nga mga empliyado sa city hall nga nangreklamo sa pamaagi sa pagpanawat karon og bag-ong mga empliyado. Sumala nila nga ang MILO nakutaw na pag-ayo tungod kay usa na lang ka focal person ug usa ka kauban ang gibilin unya giipon na kini sa ubang mga barangay nga gipangulohan na og Barangay Affairs Officer (BAO).
Ang nakaparat pa gyud karon kay, sumala sa mga pro-Rama, daghang sakop sa BO-PK ug Ehem(?) ang gipasud sa trabaho ug napadaplin ang mga lunod-patay nga Barug. Sumala sa akong tinubdan nga bisan gani ang igsuon sa mayor nagduda niining pamaagi karon sa city hall.
Ambut og unsay iyang gidudahan nga suko man kuno kini kaayo. Nasayud ba si Mayor Rama niining panghitabo diha sa city hall o iya lang gisalig kini sa iyang mga bata-bata kay busy pa kaayo siya sa ubang kalihukan.
Ang mga mayor sa Cebu City ug Lapu-Lapu City nagdamgo gyud nga mahimo ang ilang tagsa-tagsa ka mga siyudad sama sa Singapore. Maayo man nga magdamgo aron adunay maayong padulngan ang pagtimon sa renda sa pangagamhanan.
Apan alang kanako dili man lisud nga kab-uton nga masama sa Singapore ang usa ka dapit kay ang gikinahanglan niini mao lang ang good governance.
Pinaagi sa maayo nga pagdumala sa usa ka mayor aron madisiplina niya ang katawhan sa pagsunod sa mga balaud, lagda ug reglamento sa iyang dapit mas mahimo pang mas nindut ang siyudad itandi sa Singpore.
Pinaagi gud sa political will sa usa ka mayor aron pagdisiplina sa iyang konstituwente mosunod na ang kahusay ug kalinaw, kalimpiyo sa palibut, malikayan ang graft and corruption ug uban pa. Pinaagi niini madani ang mga turista ingon man mga negosyante sa pagbubo og puhonan sa siyudad.
Mao kini ang nahitabo sa Singapore. Nahimo kini sa Subic kaniadto nganong dili man mahimo kini dinhi? Ato lang ipahibawo sa mga tawo nga wala pa makaadto sa Singapore o kaha wa masayud sa ilang mga pamaagi, didto dili ka makapanigarilyo sa publiko, dili ka makapataka og pangluwa, dili ka makausap og chewing gum labi kon magsakay og train, ug uban pa. Sa laktud nga pagkasulti maayo ang pagpadagan sa ilang panggobiyerno. (mannyrabacal1144@gmail.com)