Sa kadtong gusto nga magpalahi sa ilang relaxation, aniay staycation farm nga maghatag kaninyo og kalinaw sa huna-huna diin maka-recharge mo gikan sa stress sa trabaho, personal nga problema o kahasol sa siyudad.
Ang Adlawon Vacation Farm usa sa mga nagpahiii nga bahandi sa bukirang bahin sa dakbayan sa Sugbo nga nahiluna sa 15 ka ektarya nga property.
Gawas sa pagpanuroy sa lugar, haom sab ang maong vacation farm nga venue alang sa retreat, team building, parties sama sa birthday, anniversary o wedding reception.
UNSAY NAA?
Ang Adlawon Vacation Farm unang gibuksan niadtong 2018 nga adunay mini mahogany forest, gilibutan sab og mga nagkadaiyang matang sa tanom, utanon, buwak, prutasan sama sa durian ug miracle fruit.
Gawas pa, aduna sab silay seedling nursery (Plantasia), fishpond, kahayupan, adunay kuwadra, obstacle course, basketball/multi-purpose court, picnic area, bike trail, naa sab ang Resurrection Chapel ug kaugalingong Stations of the Cross.
Ang ilang lodge maoy labing unang estraktura nga natukod sa farm nga hitsas sa reception area, front desk, adunay duha ka function rooms, restaurant nga mao ang Kusina Luche, library, lounge, entertainment center, view deck ug tulo ka air conditioned guest rooms nga adunay toilet and bath.
Kadtong magdala og bata, adunay arcade nga sila makaduwa-duwa og croquet, naa say cocoon swings nga gitaod sa punoan.
Naay souvenir shop nga nagtanyag og mga item sama sa handmade bags, mug, olive oil, suka, cookies ug pastillas.
Adunay Farmer’s Market nga namaligya sa reasonable nga presyo sa utanon ug prutas.
RATE
Ang overnight stay sa weekdays mokabat og P3,500 nga good for two persons nga may libreng breakfast, samtang lahi nga rate sa weekend nga moabot sa P4,000.
Sa mga nag-budget, adunay payag nga kasudlan og unom ka tawo sa tag-P3,000 ang gabii, apan walay aircon ug libreng pamahaw.
UNSAON PAG-ADTO?
Gikan sa J.Y. Square Mall, mahimong mosakay og habalhabal nga lahos sa Adlawon Vacation Farm sa P400 roundtrip, good for 2 persons na.
Mahimong mangayo kanimo ang drayber og dugang nga bayad sa paghulat nga P100-200 kada oras depende sa sabot.
Ang biyahe moabot g 30-45 minutos aron makaabot didto.
Sa kadtong adunay kaugalingong transportasyon mas maayo nga mogamit og directional app aron pag-navigate sa inyong rota paingon sa Adlawon Vacation Farm aron di masaag.
Adunay igong parking space ang lugar sa inyong mga sakyanan.
DUGANG INPORMASYON
Ang Adlawon Vacation Farm anaa mahimutang sa Sitio Proper, Brgy. Adlaon, dakbayan sa Sugbo.
Mahimong makontak sa : (032) 516-3948 ug (032) 516-3918 o pinaagi mobile: (0942) 266-7392, (091) 523-1406, (0931) 190-5913 ug (0942) 266-7392. E-mail: avf.cebu@gmail.com.
Abli ang vacation farm sa adlawng Miyerkules - Domingo, 9 AM - 8 PM.
Admission: P150 matag guest P50 kay konsumo sa pagkaon ug ilimnon) ug P00 kada bata kutob sa nag-edad og 12 anyos samtang way bayad ang tres anyos paubos.