Dul-an sa 1.3 milyunes ka mga benepisaryo sa Pantawid Pamilyang Pilipino Program (4Ps) tangtangon gikan sa listahan tungod kay dili na sila makonsiderar nga ‘kabus’ ug ang uban inactive na, sumala sa ulohang buhatan sa Department of Social Welfare and Development (DSWD).
Si Press Secretary Trixie Cruz-Angeles niingon nga atol sa ikatulong Cabinet meeting nga gipangulohan ni Presidente Ferdinand “Bongbong” Marcos Jr. niadtong Martes, Hulyo 19, 2022, si DSWD Secretary Erwin Tulfo nitaho nga kasamtangan nilang gi-revalidate ang listahan sa 4Ps beneficiaries.
“Of note is Sec. Erwin Tulfo’s declaration that in the Pantawid Pamilyang Pilipino Program, at least 1.3 million beneficiaries out of 4.4 million are no longer considered ‘poor’ as a qualification for the 4Ps benefits,” matod ni Angeles.
“This frees up P15B for other qualified persons to replace them and now be included in the 4Ps program,” dugang niya.
Ang 4Ps usa ka conditional cash transfer program sa gobyerno nga makatabang sa labing kabus sa mga kabus nga pamilya sa nasud ilabina sa pagpalambo sa panglawas, nutrisyon ug edukasyon sa mga bata nga nag-edad og 0-18.
Nagtabang kini sa gobyerno sa Pilipinas nga matuman ang ilang pasalig sa Millennium Development Goals (MDGs), ilabina sa pagwagtang sa grabeng kakabus ug kagutom, sa pagkab-ot sa unibersal nga primary education, pagpasiugda sa gender equality, pagpakunhod sa kamatayon sa bata, ug pagpalambo sa maternal health care.
Ang DSWD maoy nangulo sa pagpatuman sa 4Ps.
CENTRAL VISAYAS
Ang DSWD 7 niawhag sa 4Ps beneficiaries sa pag-update sa ilang information data.
Ning Hulyo 2022, sumala sa DSWD 7, dunay 17,639 ka inactive 4Ps households sa Central Visayas nga dili na makita sa ilang address o gipuy-an ug wala moproseso o wa mo-file sa request for transfer of residence; pamilya nga dili na eligible members for education monitoring; ug pamilya nga temporaryong nasuspenso tungod sa kalamidad sa Covid-19 pandemic.
“We are calling our 4Ps beneficiaries in case they still have 0-18 children to immediately approach their Pantawid Pamilya City and Municipal Links (C/MLs) so that their information data will be updated and will be properly assessed,” matod ni DSWD-7 OIC-Regional Director Shalaine Marie Lucero sa ilang press release.
Si Director Lucero nipasabot nga responsibilidad sa benepisaryo sa paghatag og updated information bahin sa ilang pagpuyo ug kini kabahin sa ilang gipanumpaan sa pagsulod sa programa.
TAGAL PAG-UPDATE
Ang 4Ps nga pamilya nga mapakyas sa pag-update sa impormasyon, gitagalan hangtod sa Hulyo 25, 2022, aron dili awtomatik nga matangtang sa listahan.
Nagpasabot kini nga dili na makadawat og ayuda ug ubang benepisyo gikan sa programa.
“This is part of our commitment to update and clean the list of the 4Ps beneficiaries, and we are currently strengthening our data management efforts to ensure that all “unqualified” and “ineligible” beneficiaries will be removed from the program,” dugang sa pamahayag ni Lucero.
Sa 2022, ang DSWD Field Office VII nipapas na sa 374 ka mga pamilya human nilambo na ang ilang panginabuhi nga nakaabot sa level of well-being ug 10 ka pamilya ang napapas human wala nakasunod sa program conditionalities.
Sa pagkakaron, dunay 306,281 ka household beneficiaries sa Central Visayas.
Ang mga benepisaryo kinahanglan motuman sa mga kondisyon sa programa sama sa pagpatungha sa mga bata, pre ug post-natal care sa inahan, regular ug preventive check-ups sa mga bata nga nag-edad og 5 anyos paubos, deworming sa nag-edad og 6 ngadto sa 14 anyos, ug pagtambong sa monthly Family Development Sessions (FDS).
Makadawat usab sila og cash assitance.(SunStar Philippines / DSWD 7)