NAPUHAG sa awtoridad ang salag sa ilegal nga druga sa Barangay Astorga, Sta. Cruz atol sa operasyon nga gipangunahan sa Philippine Drug Enforcement Agency (PDEA)-Davao Region, pasado alas 3 sa hapon, Hulyo 20, 2022.
Subay sa taho gikan sa PDEA-Davao, nakadawat sila og impormasyon gikan sa kasaligan nga impormante labot sa ilegal nga aktibidad sa target nga usa ka alyas Tantan, 42-anyos, kinsa number 6 Provincial Target List sa Davao del Sur.
Uban sa PDEA ang Provincial Drug Enforcement Unit sa Davao Sur Police Provincial Office ug Sta. Cruz Municipal Police Station ilang girumbo ang Sitio Cubingon, sa Barangay Astorga.
Naaktuhan ang target ug gilayon kining giposasan, diin nakuha sa iyang posisyon ang 1 gramo nga gituohang shabu nga dunay street value nga P10,000.
Atol sa operasyon, anaa ang iyang asawa nga si alyas Aileen, laing bisita nga si Rolly nga apil sa gipang-aresto samtang usa ka menor de edad ang naluwas kinsa naa atol sa operasyon.
Apil sa nahipos ang lain pang pito ka pakite nga dunay gituohang shabu, dunay gibug-aton nga 15 gramos, balor P225,000, assorted drug paraphernalia, ug ang marked money.
Gipangkasohan na ang mga nahisgutan, samtang ang menor de edad gi-turnover sa Sta. Cruz Municipal Social Welfare Development Office.