Nakabaton og dakong kadasig ang Gilas Pilipinas human gianunsyo sa Samahang Basketbol ng Pilipinas (SBP) nga moduwa sa national team ang Fil-Am nga pambato sa Utah Jazz nga si Jordan Clarkson alang sa 2023 FIBA World Cup.

Hinuon wala gibutyag sa SBP kon nakakuha na ba si Clarkson og opisyal nga release papers gikan sa FIBA ug National Basketball Association (NBA).

Nidugang ang SBP nga aduna say posibilidad nga ang kanhi NBA 6th Man of the Year awardee makaduwa na sa Gilas Pilipinas alang sa fourth window sa World Cup Asian qualifiers nga gikatakda sa sunod buwan.

“Utah Jazz guard Jordan Clarkson is sure to play in the World Cup and will likely join Gilas in the fourth window against Lebanon in Beirut on Aug. 25 and Saudi Arabia at the MOA Arena on Aug. 29,” tipik sa opisyal nga pamahayag sa SBP nga napatik sa www.gmanews.tv.

Apan dili na makaduwa ang 30 anyos nga si Clarkson sa magsunod nga windows sa World Cup Asian qualifiers gumikan kay masumpaki na ang eskedyul niini sa bag-ong season sa NBA.

Sa laing bahin, ang SBP mosuway sab pagkuha sa batan-ong higante nga si Kai Sotto aron makaduwa sa Gilas Pilipinas kauban si Clarkson.

Si Sotto padayon pa sa paghimo og lakang alang sa iyang tinguha nga matuman ang iyang pangandoy nga mahimong labing unang lumad nga Pinoy nga makaduwa sa NBA.

Niapil si Sotto sa miaging NBA draft apan wala’y nipili niini.

“SBP will reach out to Kai Sotto for the three windows, SEA Games and the World Cup.”

Pareho nang nakaduwa sa Gilas Pilipinas sila si Clarkson ug Sotto kaniadto.