Daghang rason nganong ang atong panit molagom o mabun-og sama sa pagka hulog, bangga ug uban pang nakadaot.
Kasagaran harmless kini o way kaso apan kon maglagomlagom pa gani bisag wa ka mabangga, maigo o mahulog, nagpasabot kini nga dunay laing gibati ang imong lawas nga di angay ibaliwala.
Matod sa Mayo Clinic kon ang panit mabangga o maduot, ang mga gagmay nga ugat ini sa ilawom sa panit madaot o magisi sab unya kon di magisi ang mga gagmay nga ugat, ang dugo nga naa sa kaugatan matangkong o magpundo sa ilawom sa panit.
Magsugod kini sa pagpamula, hangtod mo lagom unya hinayhinay nga mo lubad ug mobalik sa normal. Usahay maabtan kini og duha ka mga semana ngadto sa usa ka buwan una maayo.
Kining ubang rason sa pagkabun-og ang di angay ibaliwala sa tagtungod:
Ang mga tambal nga gipang-inum sama sa mga blood thinners nga makapalasaw sa dugo (aspirin, heparin, warfarin) makaingon sa paglagom sa panit. Ang uban sab nga anti-depressants ug steroids nga mga drugas makapaluya sa kaugatan nga maoy agianan sa dugo maong dali ra mabun-og.
Sunod ang pag-abuso sa alcohol nga makapadaot sa atay. Kon masubrahan sa inum, ang atay moundang sab paghimo og protein nga motabang sa blood clot. Ang mahitabo, mohubag na sab ang tiil, unya motimgas sab ang kolor sa ihi dayon mag-dalag ang pamanit.
Sunod kining pagkadaot sa atay. Kon madaot na gali ang atay di na kini makahimo og blood clotting proteins nga maoy makaingon sa paglagumlagom ug pagdugo. Ang uban magkasakit og cirrhosis of the liver.
Cancer sama sa leukemia. Kon ang maglagumlagom diha sa parti sa lawas nga di ginhapong daling mabun-og sama sa tiyan, o kalit nga pagdugo sa ilong (nose bleeds) o gums, pasabot ini nga ubos ang platelet nga posibling naay cancer sa dugo (blood cancer).
Lakip sa rason mao ang kakuwang sa Bitamina (Vitamin C, B12 ug K), nasakit og diabetes o sepsis, ubos og platelet count, nasubrahan sa pag-ehersisyo ug pagkaedaran.