Panahon sa pandemic, dali-daling namutang ang Dept. of Public Works and Highways (DPHW) og mga bike lane sa urban centers sa nasod kay nagkadaghan ang nanggamit sa biseklita isip mode of transportation kay lisod ang public transport.
Usa sa mga nakabenepisyo niini mao ang dakbayan sa Sugbo nga nahaum usab sa pagpalihok ni anhing mayor Edgardo Labella sa Sugbo Bike Lanes Board nga gipangulohan ni manlalaban Gerardo ‘Gerry’ Carillo. Nitukod si Carillo og Bike Patrollers nga nagtabang sa Cebu City Transportation Office (CCTO) sa pagpatuman sa mga lagda sa bike ordinance nga napasar sa 2014.
Apan sa 2020 na napatuman og sugod kay ang administrasyong Osmeña wa nagpakabana. Sa akong tan-aw, limitado kaayo ang functional nga bike lanes sa siyudad tungod kay kadaghanan dunay nag park nga sakyanan. Maihap lang ang mga dapit nga gitahod ang bike lanes sa mga motorista.
NA SAB?
Di nato mabasol nga daghan sa bikers ang di manubay tungod kay ang ilang lane nga gamay pa, ilugan pa sa mga motorista, labina sa mga nagmotorsiklo.
Pakyas gani ang bike lane implementation, nakahuna-huna ang mga traffic official sa tulo ka mga siyudad sa pagpatuman og interconnected motorcycle lane. Nagpasabot nga konektado nga lanes alang sa mga motorsiklo gikan sa Talisay City paingon sa Mandaue City ug vice versa.
Wa koy supak ani tungod kay alang ni sa kaluwasan sa mga nagmotorsiklo. Ang wa nako mauyoni ang pagtugot unya sa CCTO nga pwede sa ubang mga sakyanan nga makasulod sa lane.
Sa di pa ni ipatuman, kinahanglan nga tun-an ang pag-implementar kon epektibo ba. Hain ang mas maayo, exclusive nga lane or pasudlan og lain? Ingon ana ang pagpatuman og mga lagda ug polisiya di kay maora lang og magic.
Kana bitawng bike ordinance, kinabag-an sa input niana gikan namong bikers, apan dunay mga revision nga gihimo ang mga konsehal kay mga pulitiko lagi, hadlok sa exclusive bike lane.
Sa wa pa namo na giduso, ang akong mga kauban sa Tindak Sugbo nagpahigayon og mga group ride kada Dominggo aron pagtuon hain sa mga karsada nga mamahimong prayoridad sa bike lanes. Naa miy natumbok nga mga dan nga mahimo kaayong mabutangan ini.
Apan sa pagsulod na sa DPWH niadtong 2020, tanang dan nga dagko sa Cebu City ug Mandaue gipabutangan og bike lanes. Diretso ang pagpatuman, apan tan-awa ang implementation, kon akoy pangutan-on, half-baked.
Busa, sa di pa mopatuman og polisiya, tun-i una ninyo pag-ayo aron di mapalpak.