2 gipusil, patay; PWD giakusahang kawatan

 GIPUSIL: Giyayungan ang lawas ni Gregorio Maambong, Jr. human siya pusila sa usa ka gunman nga nagsakay og motorsiklo atol sa kapistahan sa ilang dapit sa Purok 2, Brgy. Tampaan, lungsod sa Aloguinsan, Sugbo. / TAMPO SA ALOGUINSAN POLICE
GIPUSIL: Giyayungan ang lawas ni Gregorio Maambong, Jr. human siya pusila sa usa ka gunman nga nagsakay og motorsiklo atol sa kapistahan sa ilang dapit sa Purok 2, Brgy. Tampaan, lungsod sa Aloguinsan, Sugbo. / TAMPO SA ALOGUINSAN POLICE

Duha ka mga tawo ang nangamatay sa mga pagpamusil sa Sugbo sa managlahing mga dapit ug adlaw, apan mga killer pulos nagmotorsiklo.

Sa Sabado sa alas 7:15 sa buntag, Hulyo 23, usa ka person with disability (PWD) gipusil patay sa nagbinugtong nga gunman nga nagmotorsiklo sa Purok Candle, Sitio Fatima, Brgy. Lower Lipata, lungsod sa Minglanilla.

Ang biktima giila sa kapulisan nga si Adrin Solamo LLamas, 35, ulitawo, maglisod paglakaw, samtang ang gunman gihulagway sa mga saksi nga nag sweat shirt, nag maong pants, nag helmet, nag face mask ug nisakay og Suzuki Smash nga itom nga motorsiklo.

Si Llamas nakaangkon og mga samad sa kalawasan.

Si Police Staff Sgt. Allan Villasorda sa Minglanilla Police Station nga nahinabi sa Superbalita Cebu, nagkanayon nga ang mga saksi ningbutyag nga ang biktima naglingkod sa lingkuranan sa iyang sari-sari store.

Kalit nga niabot ang gunman ug gidiretso sa pagpusil sa makadaghan ang biktima.

Daling nisibat ang gunman sakay sa motorsiklo samtang si Llamas patay diha-diha.

Narekuber sa kapulisan gikan sa crime scene ang tulo ka mga kabhang sa bala sa kalibre .45 nga pistola ug usa ka bala sa kalibre .45 nga wala ka buto.

Matud ni Villasorda nga ang amahan ni LLamas nga si Bienvinido, 61, ug inahan nga si Florenda, 60, nagtuo nga gumikan sa sakit nga kleptomania sa ilang anak, kini gipatay.

Ang mga ginikanan ningbutyag nga dunay record sa pagpangawat ang ilang anak sa Brgy. Linao, Minglanilla, sa milabayng duha na ka semana.

Dunay ningreklamo sa ilang barangay nga taga Lawaan III, dakbayan sa Talisay nga giingong gikawatan ni Llamas og cash nga P30,000.

Ang mga ginikanan ningpatunga pinaagi sa amicable settlement ug gibayran ang reklamante.

BAHAD?

Usa sa mga kuyog sa reklamante gikutlo sa mga ginikanan nga nipahimangno. “Kontrola nang imong anak, Nang! Kay og motaak nag Lawaan, Talisay og balik, naa gyud hayaon,” sumala ni Villasorda base sa saysay sa inahan.

Matud niya nga daghan nang nangreklamo batok sa biktima gumikan sa giingong pagkahilabtanon apan giingong i-settle sa mga ginikanan.

Tungod niini, ang mga reklamo wala nakaabot sa kapulisan busa walay kasong napasaka batok sa mga biktima.

Dugang ni Villasorda, nga dili layo ang posibilidad nga kadtong uban nga nabiktima niini nagdumot kang Llamas.

Hinuon nagpadayon ang imbestigasyon sa kapulisan kabahin niini.

ALOGUINSAN

Negusyante gipusil patay sa duha ka mga lalaki nga nagsakay og motorsiklo samtang mitambong sa fiesta sa alas 3:00 sa hapon sa Biyernes sa Purok 2, Barangay Tampaan, lungsod sa Aloguinsan.

Ang biktima giilang si Gregorio Maambong Jr., 64, tag-iya og poultry farm, nagpuyo sa dapit. Siya nakaangkon og upat ka mga samad pinusilan sa ulo ug kalawasan.

Wala pa nailhi sa kapulisan ang duha ka mga killer nga nagsakay sa usa ka Rusi motorsiklo nga kolor puwa ug itom.

Si Police Corporal Jose Sayson, sa Aloguinsan Police Station nga nahinabi sa Superbalita Cebu, nagkanayon nga fiesta sa dapit.

Si Maambong uban sa mga silingan nagtagay samtang nag-andam sa mga lamesa alang sa kalihukan sa fiesta.

Dunay duwa sa basketball niadtong orasa ingon man ubang mga kalihukan.

Sa wala damha, nibutho ang gunman nga nagtabon og sinena sa iyang nawong, nakasul-ob og kolor puwa nga t-shirt.

Gipusil niini ang biktima sa ulo sa makadaghan dayon gipusil sab ang dughan

Naglakaw ang gunman human sa kremin dayon nisakay sa nagpaabot nga motorsiklo nga naghuwat sa unahan.

Ang kapulisan nakarekuber sa upat ka mga kabhang sa kalibre .45 nga pistola sa crime scene.

Matud ni Sayson nga walay kontra ang biktima base sa gibutyag sa asawa, apan dunay panahon nga magmaoy kon mahubog.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph