WALA na nako namatngunan ang paspas nga pagligad sa mga katuigan, ika-23 ka tuig naman diay sa SunStar SuperBalita Davao, Hulyo 23 pero ning adlawa ang pagselebrar.
Mora'g kagahapon lang ang pagpaila ini sa publiko niadtong tuig 1999 nga gipasiugdahan nila anhing Ely Luciano ug ang mitaliwan nga veteran journalist Antonio M. Ajero, (maayong paglakaw sir AMA).
Ang SuperBalita Davao usa sa mga nailhan ug sikat kaayo nga mantalaan sa Davao Region nga nakabase sa Davao City, kini tungod sa mga headlines niini nga makapadani sa mga readers.
Tabloid format nga newspaper nga maoy nag-una ug nagbansiwag nga mantalaan nganha sa mga newsstands sa palengke, ug No. 1 newspaper nga ginadala sa mga binati namong mga news boys.
Gumikan sa tumong nga makahatag og tinuod, makalingaw ug lab-as nga mga balita ug impormasyon, daghan na sab og mga natabangan pinaagi sa paghatud niini og serbisyo publiko, ingon man nahimong panginabuhian.
Sa paglabay sa mga katuigan, daghan og mga pagbag-o, gikan sa natad sa readership niini ug ang punto sa iyang kapaingnan luyo sa kamatuoran nga ania na kita sa digital era.
Dili ikalimod nga ang tanan diha na karon sa social media nag-atang og mga panghitabo sa palibot, anaa na sa matag selpon ang mga impormasyon nga niadto sa newspaper nila mabasahan.
Kini ang usa ka dakong hagit nga ginasagubang karon sa print media, di lamang sa kinatibuk-ang SunStar Publishing Inc, kundi sa tanang printing industry nganha sa newspaper.
Tungod niini, mas gipaningkamotan pa sa Superbalita Davao ang pagpakusog sa iyang digital, diha sa paghatud og serbisyo publiko, pinaagi sa Facebook page niini ug sa nagkadaiyang digital platform sama sa YouTube, Instagram, ug TikTok.
Dili gihapon mamatay ang mantalaan, pabilin gihapon kini nga available nganha sa publiko, ug mas lauman nga mamahimo nalang kining usa ka lig-ong handumanan sa mga mabulukong takna sa kinabuhi ug usa sa mga butang nga kasaligan.
Maningkamot kami nga sa mosunod nga mga adlaw, madungagan pa ang among pagpakusog sa mantalaan, dungan sa social media aron nga mas komprehensibo ug lab-as gihapon ang mga impormasyon nga angay masayran natong tanan.
Ang among pagpasalamat sa tanang Dabawenyo, sa mga lunod-patay nga Super Suki ug sa mga nagsunod sa social media platform sa SunStar Superbalita Davao, walay kinutuban... magpabilin kami nga mohatud sa patas, tinuod, makalingaw ug lab-as nga mga impormasyon. Daghang salamat, tungod ninyo, naabot kami ning mga tuiga. Happy 23rd Anniversary SuperBalita Davao!