Usa sa mga nagsunod ning atong kolum, nga ato lang taguon sa ngan nga Vanessa, nangutana kon magpadayon ba ang mga floating cottages sa lungsod sa Cordova kay ganahan siya nga moadto didto.
Sa atong nasayran, wa man magmando si Cordova Mayor Cesar “Didoy” Suan nga tangtangon ang floating ug fixed cottages sa iyang lungsod, labi na diha sa Barangay Poblacion ug sa Barangay Catarman.
Wa pa ko makaadto sa floating cottages sa Cordova. Ang akong naadtoan, dugay na kaayo, mao ang floating bar didto sa isla sa Malapascua sa lungsod sa Daanbantayan sa amihanang bahin sa lalawigan sa Sugbo.
Ambot lang kon wa ba kaha kadto ilampornas sa mga bagyo nga milabay sa maong dapit. Di ko makalimot kay sa pag-adto nako sa floating bar, naglakaw ko nga nagtiniil kay mabaw ra man ang tubig. Nakatunob kog tulo ka buok tuyom. Naluoy ko sa mga tuyom sa ilang wa damha nga kamatayon.
* * *
Hayan nga managhan pa ning floating cottages sa kadagatan sa isla sa Mactan. Ning bag-o lang si Lapu-Lapu City Mayor Junard “Ahong” Chan niingon nga gusto niyang butangan og floating cottages ang dagat duol sa Mactan Shrine.
Mahimo ning kompetensiya sa floating cottages sa lungsod sa Cordova. Apan daghan na hinuon og kapilian ang mga turista nga mohugop diha sa Mactan.
Ang labing mahinungdanon mao ang desinyo unya sa floating cottages. Delikado nga imbis makapanindot sa dapit sa Mactan Shrine, mahimo na hinuon sila nga usa ka “eyesore” nga makapuling sa mata ug sambol sa panan-aw.
* * *
Mahinungdanon ingon man ang pagpatunhay sa kalimpyo sa kadagatan nga gibutangan sa maong floating cottages. Duna ba silay pottable toilets? Di ba nila itambog lang sa dagat ang ilang basura?
Ang Department of Environment and Natural Resources (DENR) 7 nikuha na og water samples sa dapit sa floating cottages. Mahibaw-an na unya nato ang epekto niini sa atong kalikupan.
Busa, karon pa lang, gikinahanglan ang regulasyon sa operasyon sa floating cottages aron di maguba ang atong kalikupan tungod sa atong tinguha mga mobarog pagbalik ang industriya sa turismo.