P15.7M balor sa gidiling druga nasakmit, daghang nasikop sa gilusad nga Sacleo sa PRO 7

Moabot og P15.7 milyunes nga balor sa illegal nga drugas ang nasakmit sa kapulisan sa Central Visayas atol sa usa ka adlaw nga Simultaneous Anti-Criminality and Law Enforcement Operation (Sacleo).

Gisugdan ang lapad nga operasyon sa tanang kapulisan ubos sa Police Regional Office (PRO) 7 sa alas 12:01 sa kaadlawon sa Biyernes, Hulyo 22, 2022 ug natapos kini pagka Sabado sa alas 12:01 sa kaadlawon, Hulyo 23, 2022.

Matod ni Police Brigadier General Roque Eduardo Vega, hepe sa PRO 7, dunay kinatibuk-ang 182 ka anti-illegal drug operations nga niresulta sa pagkasikop sa 214 ka drug personalities.

Pipila kanila giila nga high value individuals.

Nakasakmit og 1,726.02 gramos nga gituohang shabu nga adunay standard drug price nga P11,736,936 samtang 33,336.53 gramos sa marijuana nga mokantidad sa P4,000,384.

Gawas sa illegal nga drugas, 261 ka tawo nasikop sa illegal nga sugal diin nakasakmit sila og 174 ka gambling paraphernalia ug cash nga P22,633.

Sa kampanya batok sa loose firearms, 21 ka mga tawo ang nasikop sa 194 ka mga operasyon ug nakaimbargo silag 23 ka mga armas ug eksplosibo samtang 245 usab ka wanted persons ang ilang nadakpan pinasikad sa warrants of arrest.

Gipasigarbo usab ni Vega ang kalampusan nga nahimo sa kapulisan sa probinsya sa Sugbo diin nakadakop silag tulo ka most wanted person sa provincial level niini ug duha ka Children in Conflict with the Law (CICL).

Ang tulo nga nadakpan giila nga sila si Ryle Marilit Sadili, 18, Alvin Dinawanao, 35 ug Julio Pondar Taborada, 59.

Samtang ang duha ka CICL gikustodiya kini sa Women and Children Protection Desk (WCPD).

Ang dungan nga operasyon sa WCPD ug Consolacion Police Station misikop kang Sadili ug sa duha ka CICL sa Biyernes, Hulyo 22, sa alas 7:30 sa buntag sa Sitio Taytayan, Barangay Buhisan, dakbayan sa Sugbo.

Ang kapulisan armado kinig warrant of arrest nga giluwatan ni Judge Leah Iligan Geraldez, Branch 20 sa Regional Trial Court sa dakbayan sa Sugbo sa kasong pagpanglugos.

Apan mitugot ang korte nga mopiyansa ang duha ka CICL sa kanditad nga P200,000.

Sa dakbayan sa Sugbo, nakadakop ang Cebu City Police Office (CCPO) og number 6 most wanted person sa provincial level alas 9 sa Biyernes sa buntag, Hulyo 22, sa Sitio Kawayan, Sambag II.

Ang City Mobile Force Company sa dakbayan sa Sugbo uban sa Balamban Police Station ug Criminal Detection and Detection Group (CIDG), Cebu City Field Unit, dunngan nga ni-serve sa warrant of arrest batok sa akusado nga si Alvin Dinawanao, 35, nga dunay kasong kalapasan sa Section 11 sa Republic Act 9165.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph