Giila nga notadong kawatan, mihangyo sa kapulisan nga pabunyagan siya ug paeskwelahon human nadakpan niadtong Biyernes, Hulyo 22, sa hapon sa Sityo Awayan, Barangay Poblacion 3, Dakbayan sa Carcar.
Ang dinakpan giila nga si John Manuel Caballes, 18, taga Barangay Poblacion 1, siyuad sa Carcar nga giila sab nga ‘rugby boy.’
Gibiktima ni Caballes ang negosyante nga si Neil Dela Cerna, 30, minyo, taga Barangay Perrelos, Carcar.
Lakip sa nadakpan ang duha ka mga kauban sa suspek nga nag-edad og 16 ug 13 nga taga Bolinawan, Carcar.
Si Police Lt. Col. Ardioleto Cabagnot, hepe sa Carcar Police Station, nibutyag sa dihang nahinabi sa Superbalita Cebu nga ang tulo ka rugby boys na-identify pinaagi sa kuha sa CCTV footage.
Nakuha sa mga suspek ang P17,000 cash dihang gilungkab nila ang tindahan sa naasoyng biktima ug namalit gilayon og mga cellphone ang mga suspek.
Matod ni Cabagnot, kining grupo sa suspek nga menor de edad, problema sa ilang dakbayan diin daghan na silang gihimong pagpanglungkab apan dili mabilanggo tungod kay menor de edad.
Gumikan sa bisyo ingon man dunay problema sa pamilya, ang mga bata anaa sa sidewalk mangatulog.
Hinuon, ang kapulisan ug pribadong sektor sa Carcar mohimog lakang aron matabangan kining mga Children in Conflict with the Law (CICL).
Ang maong grupo sa mga batan-on maabot sab kini sa ubang lugar sa south nga bahin sa Sugbo aron manglungkab.
Si Cabagnot nagkanayon nga ilang tabangan kining dinakpan nga si Caballes, nga mabalik sa komunidad.
Ilang abagan sa tinguhang moeskwela pagbalik samtang ilaha usab nga iproseso pagpabunyag niini.