Usa ka drayber sa tricycle nga nangihi sa kasagbutan sa bakanteng luna sa Sitio Sangi, Barangay Pajo, dakbayan sa Lapu-Lapu maoy nakakita ug niluwas sa puya nga gibanabana nga nag-edad pa og lima-ka-adlaw, niadtong Sabado sa hapon, Hulyo 23, 2022.
Ang drayber, usa usab ka barangay tanod sa Pajo, nakadikubre sa puya nga babaye duol sa Mactan Airbase nga hubo ug buhi kini.
Ang puya gidala sa Carjay Lapu-Lapu City Hospital nga giatiman sa medical personnel ug nasuta ang bata dunay mga pinaakan sa mananap ug sepsis o dunay inpeksiyon.
Si Lapu-Lapu City Mayor Junard “Ahong” Chan nisugyot nga ang bata ipahiluna sa pagsagop sa City Social Welfare and Development kon mapakyas sa pagtultol sa inahan o mga ginikanan sa bata.
“Kung pakyas sila sa pagsuta niini, akong suhestiyon nga pangitaan na lang siya og mga tawong moamuma ug tinuod nga mopangga kaniya aron modako siya nga usa ka bililhong indibidwal,” mensahe sa post ni Chan sa iyang Facebook page sa Sabado, Hulyo 23, 2022.
Ang mayor nagkanayon nga nasuko ug nasakitan samtang naghunahuna usab kon ngano nga ang inahan nakahimo sa pagbiya sa bata nga hubo sa batanteng luna.
Hinuon, nisimpatiya siya sa inahan nga nakahimo niini tungod sa daghang posibilidad sama sa kakabus o kaha nag-antos usab kini sa kondisyon sa iyang pangutok hinungdan nga di mabasol.
Ang inahan o ginikanan nga responsabli sa pagbiya sa bata, posibling mag-atubang sa kasong kalapasan sa Republic Act (RA) 7610 o Special Protection of Children Against Abuse, Exploitation and Discrimination Act.
Dugang sa RA 7610, Article VI, Sec. 10 nagkanayon, “Other Acts of Neglect, Abuse, Cruelty or Exploitation and Other Conditions Prejudicial to the Child’s Development.... (a) Any person who shall commit any other acts of child abuse, cruelty or exploitation or to be responsible for other conditions prejudicial to the child’s development.., shall suffer the penalty of prision mayor in its minimum period."