Nag-andam na ang pipila ka mga ginikanan, kabataan ug magtutudlo sa pribado ug publikong tunghaan nunot sa mando sa Department of Education (DepEd) sa pag-abli sa klase karong Agusto 22. Si Education Secretary ug Vice President Sara Duterte adunay mando nga di kinahanglan ang pagsul-ob og mga uniporme sa mga tinun-an.
Matod ni Sara, ang di pagsul-ob og mga uniporme sa mga tinun-an dako og matabang sa mga pamilya nga nagkalisod karon resulta sa pagsaka sa presyo sa palaliton ug apektado sa ekonomiya may kalambigitan sa nagpadayon pang Covid 19 pandemic.
Apan sa mga publikong tunghaan, wa sad gimando nga gikinahanglan silang magsul-ob og uniporme. Hinuon kon anaa pa ang ilang uniporme ug masud pa kini nila, pwede ra usab nga ilang isul-ob aron di na mokuot pa ang mga ginikanan sa ilang bulsa aron mopalit og bag-o.
Adunay bentaha ning kamanduan ni Sara ug may pipila sad nga niingon nga di makiangayon kay kon di mag-uniporme ,hayan mabugalbugalan ang usa ka bata ilabi ning sugsugan nga mga classmate nga sige og pamantay nga nagbalikbalik ra ang iyang gisul-ob. Di malikayan nga aduna say kompetisyon sa mga gisul-ob kay naa may mga ginikanan nga mangita usab og paagi nga naay OOTD (outfit of the day) ang ilang mga anak.
Ang pagsul-ob sa uniporme mamahimo nga garbo kay imong gisul-ob kini isip nagrepresentar ka sa tunghaan. Sa samang higayon, luwas kini sa mga binuang ug dali ra mahibaw-an ang bata nga nagtungha kini nunot sa iyang uniporme. Unya sayon ra usab pag-ila kanila ilabi kadtong mga di mosulod sa klase apan tua ra diay naglaroylaroy sa mga mall ug asang dapit nga naay lingaw.
May uniporme man o wala ang mga tinun-an, ang importante nga samtang anaa sa ilang sa tunghaan, aduna silay makat-unan nga maoy modala nila sa ilang kalampusan ug mohaw-as sa ilang kalisod sa umaabot. Mag-unsa man nang nindot kaayo og senina ug plantsado kaayo ang uniporme pero way nakamauhan. Human sa mosobra duha ka tuig sa pandemya, daghang mga magtutudlo nga nangreklamo kay niabot sa senior high school apan maglisod gani sa pagbasa ug lisod kaayo nga makasabot sa ilang gihisgutan sa klase. (josephelvirtubilan@gmail.com)