USA sa mga gihisgutan sa unang State of the Nation Address (Sona) ni Pangulong Ferdinand "Bongbong" Marcos Jr. Lunes sa hapon, Hulyo 25, 2022, mao ang sitwasyon sa kasamtangan nga edukasyon sa nasud.
Sa tipik sa pamulong sa pangulo, gihisgutan niini nga anaa sila sa makuti nga pag-review sa K to 12 education sa nasud ug ang mga resulta niini, gikinahanglang nga ikonsidera.
Giingon sa pangulo nga gikinahanglan og usa ka importante ang Science, Technology, Engineering and Mathematics (STEM) subjects nga mapalambo gumikan kini ang madala sa mga kabataan alang sa highly technological competitive world gumikan nagsugod sa kabataan ang talento ug alang ni PBBM kinahanglan kining madebelop.
Giingon sab sa pangulo nga matapos na ang "poor quality" sa educational materials, "This must end," niya pa.
"Ang edukasyon ay ang tangi nating pamana, sa ating mga anak na hindi mawawaldas, kaya anumang gastusin sa kanilang pag-aaral ay hindi tayo nagtitipid, hindi rin tayo nagtatapon," ingon ni PBBM.
Butyag sab sa pangulo nga gikinahanglan sa mga estudyante ang maayong internet connectivity alang sa maayong partisipasyon niini sa pagtungha.
Suma niya, andam na ang Department of Education (DepEd) sa mga plano niini nga mamahimong luwas ang mga estudyante luyo sa bahad sa coronavirus disease (Covid-19) ug giseguro niini nga luwas ang mga klasrom nga maoy sudlan sa mga tinun-an ug mga magtutudlo sa pagbalik sa klase.
Sa laing bahin, garbo ang mga magbabalaod gikan sa Davao City nga mitambong sama nila Davao City First Congressional District Representative Paolo Z. Duterte, Second District Representative Vincent Garcia, ug Third District Representative Isidro Ungab kinsa anaa nang daan mitambong sa pagbukas sa 19th Congress, ang unang adlaw sa sesyon sa bag-ong Kongreso.
Matud ni Rep. Duterte, iyang gitugyan ang iyang hingpit nga suporta ngadto sa Presidente.
Gipasalamatan sab ni PBBM si kanhi Pangulong Rodrigo Duterte sa pagpasar sa balaod nga naglangkob sa Department of Migrant Workers, nga gikonsidera sa pangulo nga usa ka bag-ong puluy-an alang sa mga overseas Filipino workers (OFWs).
Nagsugod si Marcos sa iyang pamulong alas 4 sa hapon diin nahuman kini alas 5:19 sa hapon, usa ka oras ug dise nuwebe minutos.