DUHA ka mga ice plant nga nahimutang sa Toril District Davao City ang gipasirhan sa City Health Office (CHO) nga giingong ginakuhaan og ice sa mga food street vendors sa Toril human nga nagpositibo sa bacteria atol sa gihimong test.
Sumala ni Dr. Ashley Lopez sa City Health Office (CHO) nga ang nahisgutang duha ka mga ice plant nagpositibo sa bacteria human sa gihimong test ug may mga violation sa sanitation code sa Dakbayan sa Davao.
Giingon sa opisyal nga lakip sa nakalapas sa sanitation code mao ang ginakuhaan og tubig sa maong mga ice plant.
Kasamtangang kanselado na ang business permit sa mga nahisgutan ice plant ug dili na maka-operate.
Subay niini, gibutyag sab ni Lopez nga adunay ika-upat na nga namatay tungod sa diarrhea outbreak sa Toril District.
Giingon sa opisyal nga ang ulahing biktima mao ang usa ka 23-anyos nga healthcare worker kinsa usa ka swabber sa Davao City Health Office.
Sa taho nga saysay sa dxGM Super Radyo Davao, nikaon og tapioca ang pasyente nidtong Hulyo 15 ayha nakasinati og simtomas sa diarrhea.
Giingon nga namatay ang pasyente tungod sa severe dehydration.
Kahinumdoman, una nga natala nga namatay ang 10-anyos nga batang lalaki, gisundan kini sa usa ka 67-anyos nga lola, ug usa ka 32-anyos nga magtutudlo.
Ning kasamtangan, padayong giimbestigan sa awtoridad ang hinungdan sa diarrhea outbreak sa nahisgutan nga distrito. (Uban sa taho ni Rodel Natad, dxGM Super Radyo Davao)