GIDAKON sa kapulisan sa Hagonoy Municipal Police Station ang unom ka mga indibiduwal human nangisda gamit ang "mosquito net".
Alas 12:30 sa udto, Hulyo 24, 2022, giadtoan sa Hagonoy Municipal Police Station ang daplin sa baybayon sa Barangay Leling, Hagonoy human nga nakadawat sila og impormasyon nga dunay illegal fishing activity.
Naaktuhan sa awtoridad ang unom ka mga tawo nga nangisda gamit ang gagmay kaayo og bangag nga net hinungdan nga gipangkustodiya sila.
Nakuha sa ilang posisyon ang mga isda nga perte ka gagmay, ang pukot ug pump boat.
Depensa sa mga dinakpan nga nanginabuhi sila aron dunay makaon, apan bisan pa man, nasupak gihapon nila ang balaod sa Municipal Ordinance No. 1 series of 2016.
Sa maong ordinansa tataw nga silotan ang mga masinupakon sa ilegal nga pangisda sa maong munisipalidad.
Ang mga dinakpan temporaryong gikustodiya sa Hagonoy Municipal Police Station.