Negusyante og hayupan gitulis ug gipatay sa wa mailhing tawo sulod sa iyang balay mga alas 4:30 sa hapon sa Dominggo, Hulyo 24, 2022 sa Sitio Culansehan, Brgy. Lepanto, lungsod sa Alegria, Sugbo.
Si Ildifonso Glodove, 66, ulitawo, nag buy and sell og mga hayupan, patay na nga napalgang dunay samad dinunggaban sa buko-buko ug ubang parte sa kalawasan.
Si Patrolman James Vincent Morales, sa Alegria Police Station nga nahinabi sa Superbalita Cebu nagkanayon nga si Glodove nag-inusara nga nagpuyo sa iyang balay.
Usa kanila niadto sa iyang balay ug maoy nakakaplag sa biktima.
Mga alas 7:30 na sa gabii sa Dominggo nareport sa kapulisan sa iyang kabanay ang hitabo.
Matud ni Morales nga naabtan sa kabanay nga diha sa kusina si Glodove nagtikubo sa kawayan nga sawog.
Ubay-ubay nga mga samad dinunggaban sa lawas ang iyang nahiaguman, ang labing grabe sa buko-buko.
Nawala na ang kwarta sa biktima nga gibutang sa puntil ug gibakos sa iyang hawak.
“Giabis daw ang puntil sa hawak sa biktima. Naa didto ang kwarta,” asoy ni Morales.
Wala pa nasuta sa kabanay kon pila ang kwarta ni Glodove, apan kanunay siya nga magbakos sa iyang kwarta.
Nagtuo ang kapulisan nga taga diha ra sa ilang dapit ang tulisan.
Gisulod ang biktima samtang didto sa kusina na-busy pag-andam sa iyang panihapon.
Sa pagkakaron, nagpadayon ang imbestigasyon sa kapulisan sa insidente.