BATUNG DALIG
Makananu da kang e ulyan
Tibwan kung alto-albugan?
Katalanga ku, biga lang manaliwa kule
Ring magkulubut king kakung pitatalakaran.
Makananu da kang e paniglon
Sinese karing sabla kung pipumpunan?
Manatcha ku mung dala, milageng bintul,
Misan man e mu ke peranupan.
Makananu da kang e luguran
Santungan ning mayumu kung milabasan?
Kabang-kaba, pisalikutan da ka
Ding kanita, ngeni, at tutuki kung panigampan.
***
SANGKANAN DA KA
Sangkanan ku ing dimla ning angin neng pasku
Ban akaul dakang matigik keni king siping ku
Sangkanan ke ing panaun at manyamang malamaluktut
Kabang panuman da ka lupa’t e na bisang keka mibukud
Sangkanan ku ing pagal n’ya e ku bisang mibangun
Magtudtud-tudturan ta na keni patingapun
Sangkanan ke ing sarili ku n’ya e ra ka man aregalwan ngening pasku
Lupa ding milabasnang banwa anti ngeni, kalulu ku
Dapot sangkanan da ka naman, pauli mu ini
A maski dimut mu ing bye ta, masaya kung parati
***
E RA NA KA GINISING
E ra na ka ginising
nanding mako ku.
Inuma ra ka kanwan
at sinitsit "Mako na ku pu."
Nung mipalingap ka,
Magkasakit ku mung pamun.
Bukud king mayna na ka balugbug,
Mabayat king lub ing pasibayung lakwan ka.
E ra na ka ginising nanding meko ku.
Dapot king pamagbalik ku,
sana saganan mu kung timan pasibayu.
***
PARATI KU SANG TANDANAN
Ring mangatas a dalig,
misaldak la naman.
Ring dayat a mangalalam,
Kumati la naman.
~ Marcel Lacap, Mapilang Sunis karing Apat a Kawatasan
a meyangu king aklat a “Pasabu”
***
Ing salung kisna king pamalsinta maralas maging malabit ya. Dakal ya papasyag. Dakal ya darake karanasan a e na buring sarilinan. Nung ing malungkut mantun yang karame, antita ya naman ing masaya—magdulap ya namang apidakayan karing anting pulut panilan a yumu nang atatakman. Inya sa’t ing “Pasabu” misapwak ya uling e na agyung ipagyu king Mawli mu ning talasulat ing panamdaman nang ligaya. Buri na isalbag na iti king Paralaya, king Paroba at king Pangulu mu naman.
Ing masampat–makasulat la king Indung Siswan–subali pa king ing pamipasyag na ulata nung nu ya tubu ing talasulat kapamilatan ding bage-bage masasambitla karing penyulat na. Alimabwa kareti: ing pamagat a “Pasabu”, “dala”, “bintul” at aliwa pa, pati na ing e na agyung ipampan a lawltang keragulan na.
Karing amanu na masisilip ing kayanakan na, ing kagagaran na king pamalsinta a bala ya mung durutdurutan na ning bye na king balang penandit. Dakal lang makatwang rumirya nung amalitan da la ring kasasasalan na pauli ning pamalsinta nang kulang namu igulisak na e mu king mabilug a yatu nung e pati na king mabilug a sikluban.
Uling nung abasa mo ngan ding kawatasan ning “Pasabu”, dakal ing asabi mu king sarili mung sulit ing pagal ding mata mu uling kumabsi na ka man pusu king yumu dang mekad ngeni mu pa tikman. Ay, mura ya mu! Apanupaya mu la ring makasamut a indam a katayang English at Kinastila pauli nita, at pati na ing ditak a kanawangan king labis a pamaglarawan a nung pakasuryan mu kamatutwanan naman.
Atin pa waring dalise pamangamanu ngeni karing Kapampangan, o agyang karing aliwang lalawigan at pati na bangsa mu naman? Ala na ata. Ding pamagat makasulat la king kekatamung kulitan—a makaragdag pa king tanda ning pakamal na king kekatamung kalinangan. Ing pamangamit na king e na binang bayung aske ning timawang sunis metung pang magbulalag king kayanakan na e mu king twa nung e king panamdam na.
Bayu mu naman ing paralan a ginamit na. Ebook o Pdf ya ing Pasabu at ing dagdag nang arle ya pin ing malyari mung dandaman ing pamigale karing sablang kawatasan uling audio book ya naman bali nung i-scan me ing QR king kadwang bilungan. Kulang namu atin ya pang video. Inya sa sulit ya ing ulaga niti uling maulata a pipagalan ya at penisipan yang masalese ing pamipalimbag kaniti lakwas na neng e pa linipas a ganap ing makayawang sakit angga man ngeni.
Kulang ing misan a basa. Manyaman yang balik-balikan, ulit-ulitan. Ing patune ati yu king pamanakman.
Lwid ing Indung Siswan. Lwid ing Kapampangan!
Malyari kang saling “Pasabu” kang Marcelo B. Lacap III. Ibuklat me king Facebook bang akasabi me, abe.
***
Dake Talabaldugan:
1.mililipatwan (pangdiwa) durugpan, babagskan, tuturan ning lipatu o susulagpo baya. English – being landed on by fragments or bits of falling ember. Alimbawa king pamangamit: “Digsu na ya mu mikalabkab ing datukanan nang are Ambu neng e na pansingan mililipatwan ne keng dapug ning siping bang bale.”
2.mililisang (pangdiwa) kakaliwa, kakawani, miyayaliwa, o mililisya. English – part of something or of the body that slips, skids, slithers or slides. Alimbawa king pamangamit: “Balang lalangut yang masyas i Asyung mililisang ya panga inya malambut namu parati ing buri nang kanan uli na nita.”
3.mililisanganan/mililisangnan (pangdiwa) panamdaman ing pali o lisangan neng matas ya ing aldo o panaun ning kaleldo. English – when someone feels the effect or heat of the sun or weather’s high temperature; feeling muggy or hot. Alimbawa king pamangamit: “Neng sane ya king dimla king Amerika, saguli mililisanganan ya ing kumpari kung mig-balikbalen keta pang milabas a Duminggu.”
***
MIKASING-KABALDUGANG AMANU TAMU
1.matbud – saguling masira, malagpak, matibag; mabilis mangayna, misakab, mitomba o mikasakit. Kabilyan ning keynan.
2.mayna – kulang o alang sikanan.
3.mabuya – tambing misasakab, mitutomba, o mitutwag.
4.mabaya – saguling manasakit, manamdaman o kikyak pauli ding sisti o pamamansing ding aliwa.
5.kulembut – malambut intud, katawan o butul. Kulang o salat king sikanan at upaya.
6.lampa – maragul man dapot matbud, mayna at kulembut.
7.lunu – ebun a kulang aldo king pangasapwak, dapot magagamit a sisti karing kulembut, lampa at matbud.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.