Duha na lang ka mga estado ang way balaod sa diborsiyo, ang Pilipinas ug ang Vatican, usa sa mga labing gamay nga estado sa kalibotan.
Apan sa ato nang giingon, wa kinahanglana ang diborsiyo sa Vatican kay ang mga pari ug mga madre nga nagpuyo didto mga ulitawo ug mga dalaga man.
Sa usa ka pasiaw, nakaplagan nga ang nag-unang hinungdan sa diborsiyo didto sa Estados Unidos mao ang kaminyuon.
Kon wa pa unta makasal, wa untay diborsiyo. Kay way diborsiyo sa Pilipinas, daghan ang midangop sa pagpaanular sa kaminyuon nga gitugot ubos sa Family Code of the Philippines.
Daghan nang mga tinguha nga mahimong legal ang diborsiyo sa Pilipinas. Apan wa pa kini molampos.
Ang mayoriya sa mga hingkod na nga Pilipino, 53 porsyento, uyon nga mahimong legal ang diborsiyo, sumala sa usa ka survey sa Social Weather System (SWS) niadtong tuig 2017.
Busa nagpadayon ang tinguha nga mahimo kining legal. Sa bag-ong Senado, tulo ka mga senador ang mipasaka og tagsa ka balaudnon nga nagtinguha nga tugotan ang diborsiyo.
Si Senador Risa Hontiveros mipasaka sa iyang giproponer nga Dissolution of Marriage Act, si Senador Raffy Tulfo mipasaka sa iyang balaudnon alang sa Divorce Act of 2022, samtang si Senador Robin Padilla mipasaka sa usa ka balaudnon alang sa Divorce Act of the Philippines.
Ubos sa Family Code, mahimong maanular ang kaminyuon kon way parental consent kadtong magpakasal sa edad 18 ngadto sa 21 anyos, kon dunay psychological incapacity, kon ang pag-uyon sa pagpakasal nakuha sa limbong, sa wa pagtug-an sa usa ka material fact, pagtago nga nimabdos sa laing lalaki o may sexually transmitted disease, panghulga aron magpakasal o “shotgun marriage,” di makahilawas ug ang usa sa magtiayon gitakboyan sa usa ka sexually-transmissible disease nga way kaayohan.
Ang kalainan mao nga sa annulment ideklarar nga nulo ang kaminyuon sukad sa sinugdan, sama da nga wa kini mahitabo.
Samtang sa diborsiyo, giila ug gitapos ang usa ka legal ug balido nga kaminyuon. Gibana-bana nga mokabat sa P250,000 ngadto sa P500,000 ang gastuhon alang sa annulment sa kaminyuon.
Sumala sa Office of the Solicitor General, nisaka ang mga kaso sa annulment and nullity of marriage sa Pilipinas gikan sa 4,000 ka kaso sa 2001, hangtod sa kapin sa 11,000 ka mga kaso nga gipasaka sa tuig 2014.
Kapin sa katunga sa nipasaka sa mga kaso mga babaye ug kasagaran kanila biktima sa pagdagmal ug abuso sa ilang kapikas.
Ang mga balaudnon nila ni Senador Hontiveros, Tulfo ug Padilla mag-agi pa sa mga pagdungog sa Senado ug mahimo nga i-consolidate sa usa lang ka balaudnon.
Apan sanglit ubos man kita sa Simbahang Katoliko Romano nga nagdili sa diborsiyo, mag-agi sa mata sa dagom ang maong mga balaudnon. - edbarrita@gmail.com