GIPAGAWAS na sa Davao City Police Office (DCPO) ang impormasyon labot sa duha ka mga lalaki nga gipangdakop didto sa Freedom Park, Roxas Avenue, Davao City, Hulyo 25, atol sa usa ka rally.
Nasayran nga giaresto sa mga sakop sa Warrant ug Intel Personnel sa San Pedro Police Station 2, DCPO ug Police Regional Office (PRO-Davao) ang duha ka mga lalaki nga giingong may standing Warrant of Arrest.
Ang duha giila sa awtoridad nga sila alyas Mark, 19-anyos ug alyas Michale, 23-anyos, pulos taga Davao del Norte.
Subay sa warrant of arrest giaresto ang duha tungod sa kasong Anti-Trafficking of Persons Act of 2003 o Republic Act (RA) 9208 as amended sa RA 10364 nga gi-pagawas ni Judge Jimmy Bustillo Boco sa Regional Trial Court (RTC-11) Branch 2 Tagum City, Davao del Norte niadtong Hunyo 7, 2022 nga walay girekomendang piyansa.
Sa taho sa KAMM Media Network, usa ka PJ Dizon, ang secretary general sa Kilusang Mayo Uno Southern Mindanao, ang mikumperma nga apil ang duha sa rally sa Freedom Park kagahapon sa hapon atol sa Sona ni Pangulong Ferdinand "Bongbong" Marcos Jr.
Ning kasamtangan, ang duruha gipangkustodiya sa San Pedro Police Station.