DUL-AN upat ka semana na lang sa gitakdang kasal, usa ka 36-anyos nga lalaki ang namatay samtang nangandam sa dakong okasyon tungod sa diarrhea outbreak sa Toril, siyudad sa Davao nga mitala na og lima ka mga tawo ang namatay sukad Hulyo 26.
Gisulti ni City Health Office (CHO) head Dr. Ashley Lopez sa paghinabi sa SunStar Davao nga ang pasyente kinsa bag-ohay lang namatay gitakda nang magpakasal sa Agosto 20.
"Ni-attend pa siya og mora'g premarital counseling kauban iyahang [wife to be], siya lang nikaon [sa Rasay Street Night Market niadtong Hulyo 14]," matud ni Lopez.
Nipahibawo ang pasyente sa iyang gibating simtomas sa pagka-Hulyo 15 ug giingong nag-self-medication sulod sa upat ka adlaw hangtud nga nahimong "severe case" sa pagka-unom ka adlaw (Hulyo 22).
Niadtong Hulyo 22, ang pasyente nihimo pa sa iyang pagpangandam sa kasal uban sa iyang minyoanan bisan sa nasinati nga kasakit tungod sa diarrhea apan alas 5:00 sa hapon, gidala siya sa St. John Hospital, apan tungod kay way bakanteng higdaanan, gibalhin siya ngadto sa Adventist Hospital Davao City apan gideklarang patay na sa pag-abot.
Sa Facebook page sa usa sa mga miyembro sa pamilya sa pasyente gamit ang ngalan nga Cnith Almero Ambohot, matud niya nga wa gyud madahom ang tanan nga mahitabo kadto.
"Grabe, wala nlang gyud ka kapaabot sa imong kasal Dong karung August 20. Imbis na settle na ang tanan gikan sa venue, seminar, sanina nga inyong suotonon, naa na moy wedding ring, nakapapre-nup [photo] namo. Humana tanan papers, paabot nlang unta ta sa inyong wedding day. Sakit kaau dawaton nga ing-ani nahitabo. Dili mi katoo nga kalit lang nawala ang tanan natong gipangandaman," matud pa ni Ambohot niadtong Hulyo 22.
Gikanayon ni Ambohot nga ang haya sa namatay naa sa ilang balay sa Toril.
Samtang gisulti ni Lopez nga atol sa regular session sa 20th Davao City Council niadtong Hulyo 26, niabot na ngadto sa 266 ka mga kaso apan ang aktibong kaso niubos na og dyutay gikan 220 hangtud sa 177 samtang 84 gitaho nga nakarekober na.