Opisyal sa Department of Health sa Central Visayas nipahibawo nga wala pay kompirmadong kaso sa monkeypox sa Central Visayas taliwa sa outbreak sa ubang dapit sa kalibutan.
Si Eugenia Mercedes Cañal sa DOH-7 Regional Epidemiological Surveillance Unit (RESU) nitug-an sa mga tigbalita atol sa press briefing sa Martes, Hulyo 26, 2022, nga nakadawat sila og duha ka gidudahang mga kaso sa viral diseases, usa gikan sa Bohol, nga dos anyos nga batang lalaki ug laing usa taga Cebu, 26 anyos nga lalaki.
Giingon ni Cañal nga ang duha ka mga kaso negatibo sa resulta sa pagsulay gikan sa mga sample nga gisumite ngadto sa Research Institute for Tropical Medicine (RITM) ug usa ka laboratoryo sa rehiyon.
Ang bata gidudahang nag chicken pox samtang ang 26 anyos skin rashes lang.
Gipasabot usab ni Cañal nga andam ang rehiyon sa pagdumala kon dunay outbreak sa monkeypox sa Central Visayas.
“Yes we are (ready), because nakaagi na gud ta og Covid nga left and right ang atong deaths and all of our hospitals has been flagged sa una pa, especially the Delta. We really responded well when the Omicron surge happened,” pagpasabot ni Cañal.
Siya nipasabot nga ang masakit sa monkeypox wa na kinahanglana pang dad-on sa ospital kay isolation lang sa balay ang gikinahanglan.
“Mas sayon ang contaiment measures, tungod kay ang iyang transmission is direct contact man, dili siya airborne, dili siya droplet.
Dili siya ma-transmit kon one-meter away ka or even one-foot away dili ka makab-ot kay dili ka matakdan. Meaning sayon siya i-contain,” pagpasabot usab ni DOH-Central Visayas Regional Director Jaime Bernadas.
BIYAHE
Sa laing bahin, nidugang si Cañal nga ang pagpanakod sa monkeypox adunay kalabotan sa kasaysayan sa pagbiyahe sa ubang mga dapit.
Matod ni Cañal nga ang Central Office adunay lista sa mga nasud nga adunay labing daghang mga kaso sa mao nga sakit ug nangandam na sila og mga lakang batok sa pagpanakod sa virus.
Una sa lista mao ang Estados Unidos, gisundan sa Spain, dayon ang Germany, UK, ug France, mga nasud nga adunay daghang mga kaso nga moabot sa liboan.
“Kon maghuna-huna ta og monkeypox, sama ra ni siya sa chickenpox o usahay sa tipdas kay mag-una lagi sa hilanat unya naa pud siyay skin lesions. So mo-start siya og ginagmay nga rash then eventually mo- breakout siya nga naa nay tubig-tubig.
Sa monkeypox lang kay naa siyay lisay-lisay which sometimes di makit-an sa chickenpox pero makit-an sa tipdas,” matod ni Cañal.