Ang Archdiocese of Cebu ug ang mga tawo nga nagpaluyo sa Diocesan Inquiry sa causes sa Beatification and Canonization ni Archbishop Teofilo Camomot nagtinguhang makadiskubre og duha pa ka mga milagro pinaagi sa intercession ni ‘Venerable’ Bishop Camomot.
Si Rev. Fr. Mhar Vincent Balili nipasabot sa Sunstar nga kining mga milagro maoy basehan sa Vatican sa pagdeklarar kang Bishop Camomot nga santos.
Nipasabot si Balili niini atol sa 3 n 1 Celebration: Dinner for A Cause, book launching sa official biography ni Camomot ug mga mugbong dula sa iyang kinabuhi nga nag-ulohan og “Tugon ni Nyor Lolong” ug “Mga Kurtina ni Barbie Doll”, sa Lunes, Hulyo 25, 2022 sa IC3 Pavilion, Cebu City.
Ang mga tinguha sa pagka santos nagsugod sa pagsusi sa usa ka kandidato sa mga opisyal sa simbahan kon nagkinabuhi ba siya nga deboto nga pagka Katoliko.
Si Balili niingon nga sa higayon nga mapamatud-an nga balaan si Bishop Camomot ug adunay milagro nga nahitabo pinaagi sa iyang intercession, siya ma-beato human sa pag-verify sa unang milagro nga natino nga iyaha. Human sa ikaduhang milagro nga nahitabo ug napamatud-an nga siya gihapon, si Camomot i-canonize pagka santo.
“Hopefully anytime soon makakita na ta og milagro nga atong gipangayo sa Ginoo,” matod ni Balili.
Sa Miyerkules, Hulyo 27, 2022, adunay Solemn Thanksgiving Mass ug ang promulgation sa decree sa Heroic Virtue of the “Venerable” Archbishop Camomot
“Kuyog nato ang Papal Nuncio, after that, tungod kay ‘venerable’ naman siya (Bishop Camomot). Padayon gihapon ta sa atong next step ug nanginahanglan na lang ta og usa ka miracle aron ma-declare siya nga beato, then, another miracle para mahimo siyang santo,” pagpasabot ni Balili sa Sunstar.
Dugang pa niya nga ang proseso sa beatification ug canonization magsugod sa Diocesan stage, dayon sundan sa Roman stage. Sunod mao ang pagpangita ug pagmatuod sa mga milagro sa dili pa ang deklarasyon sa titulo nga “blessed” ug “santo.”