Si Kongresista Arnolfo Teves Jr., sa Negros Oriental nipalabang og balaudnon nga magdeklarar sa ‘ghosting’ nga usa ka emotional offense.

Atol sa unang regular session sa 19th Congress, si Teves niduso sa House Bill 611 o “An act declaring ghosting as an emotional damage.”

Nasayran nga ang ‘ghosting’ termino nga gigamit niadtong kalit lang nga miputol sa komunikasyon ilabi na ngadto sa ilang uyab o ‘significant other.’

Pasabot ni Teves nga ang maong binuhatan makaapekto mentally, physically ug emotionally nga maoy hinungdan nga bation nga daw way bili ngadto sa ilang pares o uyab. Mahug nga way closure ang duha.

“Studies have shown that social rejection of any kind activates the same pain pathways in the brain as physical pain, meaning there’s a biological link between rejection and pain,” tipik sa natala sa House Bill 611.

Kahinumduman nga si Teves ang niduso og balaudnon nga nagsugyot sa pag-ilis sa ngalan sa Ninoy Aquino International Airport ngadto na sa Ferdinand E. Marcos International Airport.

REAKSIYON

Pipila sa mga millennials nipaambit sa ilang panahom kalabot sa maong balaudnon ni Teves.

Gisupak ni Rhea Ruth Rosell, 35, dalaga senior business development manager sa RedDoorz ang House Bill 611.

“Nagtuo ko nga walay tawo nga kinahanglan mohatag og katin-awan ni bisan kinsa aron tapuson ang iyang komunikasyon.

Nagdepende gyud kini kon giunsa pag-ila sa usa ka tawo ang iyang mga aksyon ug kon unsa ang reaksyon sa uban niini. Bisan kon ang lakang wala nagpakita sa bisan unsang gisugyot nga silot, alang kanako nga ang “ghosting” dili usa ka krimen,” matod pa ni Rosell.

Wa sab kauyon si Harvey Yburan, 37, ulitawo, supply chain planner sa maong balaudnon.

“Mas maayo tagaan og pagtagad ang mental ug emotional stress sa mga tawo nga nawagtangan og trabaho, ang mga na-stress sa pagtaas sa presyo sa palaliton ug uban pa. Ang mga nag-ghosting kay pwede ra na dagkutan og kandila ug ampoan matag adlaw sa KalagKalag,” panahom ni Yburan.

Samtang si Princess Aluel Malinao, 23, dalaga, 4th year MedTech student nagkanayon angay nang magmatngon kadtong mga way klaro sa relasyon.

“Angay na jud makuyawan ang mga way klaro ug paasa nga mga tawo. Mirisi nila hahahahaha,” nahimuot nga reaksiyon ni Malinao. (SunStar Philippines)