LAKIP nga naglaum ang mga trisikad drivers sa Compostela, Davao de Oronga mahilakip sa libreng hospitalisasyon kun "zero billing" sa upat ka mga dagkong hospital sa probinsiya sa Montevista, Maragusan, Pantukan ug Laak.

Base sa bag-ong Memorandum Order No. 1185-2022, pinetsahan Hulyo 25, 2022, nakalatid nga ang "NO BILL POLICY" nga kasamtangang giimplementar sa mga district hospitals ning probinsiya mapahimuslan lamang ngadto sa mga "indigents" nga mga pasyente kinsa molupyo sa probinsiya.

Ang kamandoman gikan sa opisina sa gobernador nga gipadala ngadto sa mga chief of hospitals ug administrative officers sa upat ka district hospitals pinaagi ni acting Provincial Administrator Fatima Montejo.

Subay sa kamandoan nga ang mga pasyente nga gitawag og "indigent" mao kadtong mga tawong walang-wala o kabus kaayo nga gitawag og "poorest of the poor" ug mga tawong walay panginabuhian.

Apan alang sa trisikad driver nga si Dodong, 42, nga dunay tulo ka buok anak nga parehong nagtungha sa elementarya, usa sila sa mga tawong walang-wala sanglit bisan og dunay siya'y panginabuhian nga trisikad dili kini paigo sa inadlaw nilang panginahanglan sa pamilya.

Gisulti ni Dodong nga dunay higayon nga mokita lamang siya og P50 sa tibuok adlaw nga pamasada, kuhaan og renta sa trisidad nga P30 mao nga ang mauli sa balay P20 na lang nga moresulta pagsuwa na lang og asin ang pamilya.

Ug sa higayon nga dunay masakit sa ilang pamilya, walang-wala gyud sila nga moadto sa ospital, mao nga nanghinaut siya nga mahilakip sa mga kwalipikado sa libreng hospitalisasyon.

Hinuon, dugang gibutyag base sa pahibalo nga ang mga dili kuwalipikado sa gitawag og indigent, ang balayrunon o "billing" sa ospital, pagabayran pinaagi sa Philippine Health Insurance (Philhealth), Malasakit Center, Wellness Center, Philippine Charity Sweepstakes Office (PCSO) ug uban pang pinansiyal nga institusyon sa gobyerno.

Apan kon duna pay mabilin sa balanse nga pagabayran sa mga pinansiyal nga institusyon sa gobyerno, pagabayran na kini mismo sa pasyente.