Kapulisan nipahimangno sa mga ginikanan nga samtang ting-uwan pa, did-an ang mga anak sa pagkaligo sa sapa kay posible ang kalit nga pagbaha.
Si Carcar City police chief Lt. Colonel Ardeolito Cabagnot, hepe sa Carcar Police Station, niluwat niini human nakit-an na ang 12 anyos nga dalagita nga naanod sa sapa dihang nibaha sa Lunes sa alas 3:00 sa hapon, Hulyo 25, 2022 sa Brgy. Can-asujan, dakbayan sa Carcar.
Atol sa baha, maayo ang panahon sa dapit nga ilang gikaliguan, apan gituohan nga nagbunok ang uwan sa bukid.
Si Jendie Paran, taga Sitio Oliveros, Brgy. Can-asujan, Carcar, na missing atol sa ilang pagpangaligo sa sapa uban sa iyang mga higala. Si Cabagnot nga nahinabi sa Superbalita Cebu nagkanayon nga si Paran nakit-an sa alas 6:00 sa buntag sa Martes sa Sitio Inayagan, Brgy. Tuyom.
Si Cabagnot nagkanayon nga 10 kilometros ang gilay-on sa dapit gikan sa gianuran sa biktima. Matud ni Cabagnot, nga si Paran uban sa laing upat ka mga batan-ong higala nangaligo sa sapa. Samtang sila nalingaw kaayo sa pagpangaligo, kalit lang silang gibanlas sa kusog nga bul-og sa tubig.
“Okay man kaayo ang panahon. Kinsay magdahom daw nga kusog man diay ang uwan sa bukid. Lingaw na unta mga bata kaligo kalit nga gibanlas,” dugang ni Cabagnot.
Gipadayag niya nga dali silang ningresponde uban sa mga personnel sa Carcar City Disaster Risk Reduction and Management Office (CCDRRMO), Bantay Dagat, Philippine Coast Guard ug kapulisan.