Suspek nga gun-for-hire nga giingong nibahad nga dili magpadakop nga buhi, patay human nakigpinusilay sa kapulisan sa Sitio Casoy, Brgy. General Climaco, dakbayan sa Toledo, ala 1:30 sa hapon sa Miyerkules, Hulyo 27, 2022.
Si Arnold Abadinas Zabate, alyas Ano, hingkod, namatay human giingong nisukol sa mga pulis nga nag-serve sa warrant of arrest sa kasong murder batok kaniya nga giisyu ni Judge Judilyn Hugo Tapia-Menchavez sa Regional Trial Court (RTC) 7 sa Toledo City.
Siya ang suspek sa pagpatay sa usa ka Elfred Villa Abella, 39, niadtong Marso 2, 2022 sa Brgy. Canlumampao, Toledo City.
Si Police Chief Master Sgt. Marciano Suarez, imbestigador sa Toledo Police Station nga nahinabi sa Superbalita Cebu, nagkanayon nga dihang niabot ang ilang kauban sa dapit, si Zabate nidagan sa nataran sa ilang balay ug nidiretso sa pagpusil sa kapulisan.
Gumikan niini, matod ni Suarez, napugos sa pagbalos ang mga pulis ug atol sa pinusilay, naigo si Zabate.
Gidala kini sa tambalanan apan patay nang niabot.
Narekuber sa posisyon sa suspek ang usa ka .357 caliber revolver nga dunay tulo ka mga bala ug usa ka kabhang.
Sumala ni Suarez, si Zabate notadong gun-for-hire ug nalambigit sa daghang mga krimen sa dakbayan apan wala makiha tungod sa kahadlok sa mga saksi.
Apan sa pagpatay kang Abella, dunay usa ka saksi nga nibarog nga nitudlo kaniya nga maoy killer hinungdan nga siya napasakaan og kaso ug nalutsan og warrant of arrest.
“Sa una pa man ni siya nagsigeg pamahad nga dili magpadakop nga buhi, unya mahadlok ang mga silingan kay daghag agi,” dugang ni Suarez.
Gihulagway ni Suarez nga atol sa operasyon ‘armed and dangerous’ si Zabate, kinsa naila sa dapit nga walay gikahadlukan.
Gawas sa pagka gun-for-hire, halos tanang illegal nga kalihukan gisudlan niini, dugang ni Suarez.