Nangguwa na ang resulta sa audit nga gihimo sa Commission on Audit (COA) sa tuig 2021.
Atong nasayran nga daghang mga local government unit (LGUs) kang kansang mga proyekto, pagpamalit og bugas ug ubang mga butang nga gihinabang ngadto sa mga kabus nga lumolupyo nga naapektuhan niadtong Covid - 19 nakit-an sa state auditors nga adunay “indications of irregularities” kun daw dunay mga kalapasan.
Kadaghanan niining nalapas mao ang sa Government Procurement Reform Act (R. A. 9184) labi na sa pagpamalit og bugas nga gidudahan nga gikan sa middlemen nga dili gikan gayud sa wholesaler ug distributor.
Ang ubang gipalitan wa gani marehistro nga negosyante og bugas ug ubang mga butang nga gipamalit sa mga LGUs. Daghang mga hingtungdang opisyal ang migamit sa ilang Public Information Officer (PIO) ug sa ubang sakop sa media aron pagpatuo nga na-clear na sila sa COA sa maong problema bisan dili tinuod.
Niadtong grabe pa ang Covid, nagpatuyang lang pagpamalit ang ubang mga LGU sa katarungan nga kini emergency purchase, nga wa nay bidding.
Naa usay mapahimuslanong mga negosyante nga adunay suod sa balay-lungsod nga maoy mahimong bugtong supplier bisan kon wa silay tindahan kay ila man lang usab kining paliton sa ilang contact ug sa tampo usab sa ilang uban nga mga higala nga buot makanegosyo isip middleman.
Atong nasayran nga daghang miburot tungod niadtong budget alang unta sa pandemic. Ang nakadaut pa kay daghang ipanghatag nga bugas nga dili na makaon og tawo tungod sa kalagum ug kabaho.
Dugay na man akong nasayud sa disallowance sa COA sa mga transaksiyon apan wa pa ko kadungog nga adunay gipabayad sa salapi sa lungsod nga wala matarong pagasto.
Labi nang way napriso sa panikas sa mga opisyal sa gobiyerno panahon niadtong grabe pa ang pandemic.
Kinahanglang tun-an ang mga magbabalaud sama sa konsehal, bokal, kongresista ug senador sa Robert’s Rules of Order as applied to parliamentary procedure.
Nakabasa man gud ko og session sa city council sa usa ka dapit diin ang vice mayor nga maoy presiding officer wala gayud mo-recognize sa mga sakop sa Konseho nga mihimo og motions apil na ang mibarug alang sa Point of Order.
Wala masayud ang presiding officer nga kinahanglan nga tugotan gayud siya sa paghimo sa iyang point of order.
Atul usab sa unang session sa Senado sa 19th Congress, murag bakikaw man kaayo ang gihimo ni Senador Robin Padilla sa pagbarug aron pagpahibawo nga wala siya mobotar kang Senador Joel Villanueva isip majority floorleader. (mannyrabacal1144@gmail.com)