Sa kaguol nga wa dawata sa pagpa-enroll sa Grade 12 tungod sa iyang gagmayng grado, usa ka 19 anyos nga lalaki naghikog pinaagi sa paghikot og pisi sa liog sa Sitio Gaong Gaong, Barangay Putingbato, dakbayan sa Toledo niadtong Miyerkules, Hulyo 27, 2022
Si Aljun (dili tinuod ngan), nagpuyo sa lugar, patay na nga napalgan sa iyang kabanay nga nagbitay sa punoan sa mangga kilid sa ilang balay.
Si Police Chief Master Sgt. Marciano Suarez, imbestigador sa Toledo Police Station nga nahinabi sa Superbalita Cebu, nagkanayon ang ang inahan sa biktima nibutyag nga naguol kaayo ang iyang anak human wala na-enroll.
Gibutyag sa inahan nga niadtong Martes sa buntag, Hulyo 26, nagpa-enroll iyang anak sa Grade 12 sa usa ka publikong tunghaan sa Toledo.
Nagbaktas lang kini sa pagpauli bisan sa ka layo sa eskwelahan tungod sa kanihit sa sakyanan sa ilang dapit.
Sa pag-abot sa ilang panimalay, sumala sa inahan, magul-anon ang iyang anak.
Gipangutana niya kon unsay problema, nitubag kini nga wala siya dawata sa Grade 12 tungod sa iyang gagmay nga mga grado sa card.
“Naghilak daw ni siya kay gagmay ang grado sa card. Duna siguroy hagbong mao nga wala madawat sa Grade 12,” dugang ni Suarez.
Matod ni Suarez, ang inahan nialam-alam sa iyang anak ug nipasalig nga ubanan pagka ugma sa buntag, Miyerkules, Hulyo 27, balik sa tunghaan aron istoryahon ug hangyuon ang maestra o principal.
Apan wala nagdahom ang inahan, dihang ila unta pukawon ang bata kay mamahaw aron mobalik sila sa eskwelahan, apan ang biktima wala sa iyang lawak.
Ilang gisusi sa gawas ug nakurat sila dihang ilang nakita nga nagbitay na kini sa punoan sa mangga nga patay na.
Si Suarez nibutyag nga ang inahan ug ang mga higala nihulagway sa biktima nga loner ug hilumon nga pagkatawo.
Hinuon, matod ni Suarez, nga dunay posibilidad nga duna pay ubang rason kon nganong nagpakamatay ang ulitawo, gawas sa iyang grado, subay sa asoy inahan.
Si Suarez nagkanayon nga ilang pakig-istoryahan og balik ang mga ginikanan sa bata ug ang tagdumala sa tunghaan aron pagkuha sa mas tukma nga istorya sa hitabo.
Samtang, usa ka opisyal sa Department of Education (DepEd) sa lalawigan nga nahinabi sa Superbalita Cebu, apan di gustong magpahingan, nagkanayon nga dawaton gyud ang mga bata nga magpa-enroll, apan kon dunay deperensiya sa grado o hagbong, dunay mga remedyo nga kini maayudahan ug makapadayon sa pagtungha ug makasaka og ang-ang sa pagtungha.
Ang enrollment period sa DepEd alang sa Schoool Year (SY) 2022-2023 nagsugod niadtong Lunes, Hulyo 25, ug motapos karong Agusto 22, adlaw sa pagsugod usab sa tingklase.