PLANO karong tukoron sa Davao del Norte ang Center for children with Special Needs nga magtumong sa paghatag og pagtagad sa mga kabataan nga adunay espesyal nga panginahanglan.
Matud pa nga usa ka ordinansa ang giduso ngadto sa Sangguniang Panlalawigan (SP) sa probinsiya kabahin sa pagmugna sa maong center kon diin niadtong Huwebes, Hulyo 28, 2022, alas 8:00 sa buntag, gipahitabo ang panaghisgot sa ordinansa nga giduso sa pagpanguna sa batan-ong bise gobernador nga si De Carlo "Oyo" Uy, kauban ang nagkadaiyang stakeholders gikan sa nagkadaiyang ahensiya sa gobyerno nga gilangkuban sa Department of Education (DepEd), Provincial Health Office (PHO), Technical Education and Skills Development Authority (Tesda), Special Education (Sped) Centers, local government units (LGUs), Department of Labor and Employment (DOLE) ug uban pa.
Sa tigum nahisgutan ang nag-unang mga problema sa mga Children with Special Needs ug usa niini ang pinansiyal nga usa sa mga gisagubang sa mga ginikanan nga dunay mga anak nga naay espesyal nga mga panginahanglan.
Nahisgutan sab ang problema sa equipment support, serbisyong medical, serbisyo sa espesyal nga pagtuon ug ang pagpanarbaho sa mga kabataan nga dunay espesyal nga panginahanglan human sila mograduwar sa ilang pag-eskuwela.
Gihisgutan sab ang posibleng mga personahe nga maoy modumala sa maong proyekto.
Sa misalmot sa tigum, lakip ang mga persons with disability (PWD), mipadayag sa ilang kalipay ug panghinaut nga maaprobahan ang maong ordinansa ug mamugna gayud ang Center For Children with special Needs.