Mas unang nakapatuman ang Dakbayan sa Mandaue sa bike lanes kay sa Cebu City nga nakapalabang na og ordinansa niadto pang 2014. Kon wa moigo ang pandemic, wa nakahuna-huna ang Cebu City Government sa pagbutang og bike lanes. Hayan tungod sab tingali kadto sa pagduol sa Dept. of Public Works and Highways (DPWH) kanila una pa sila nilihok.
Kon itandi usab ang pagpatuman sa Mandaue ug Cebu City, ang nag-una mas malampuson sa ilang implementasyon. Ang klaro kaayong palpak sa Cebu City mao ang V. Rama Ave. kay tanang plastic bollards nangawagtang.
Duna gani uban diha nga gipangdasmagan sa mga sakyanan. Sa ato pa, palpak ang pagpatuman sa Bike Lane Ordinance.
Nakapangutana ko sa akong kaugalingon kon nganong naa sa V. Rama ang gihimong prayoridad nga unta ang mas daghang mangaging mag bike to work naa sa Imus-P. del Rosario-N. Bacalso Avenue.
Nakahibawo ko niini tungod kay kada adlaw kong nakakita sa atoang kaigsuonan nga nagbiseklita sa sayong buntag ug sa hapon hangtod na sa gabii agi sa nahisgutang mga karsada.
MAG-CONNECT
Unta, naa may mga ordinansa ang duha ka mga siyudad kalabot sa bike lane, mag coordinate ang Cebu City Transportation Office (CCTO) ug Traffic Enforcement Agency of Mandaue (Team). Unya ang ilang bike lanes sumpayon lagbas sa north road hangtod na sa utlanan sa dakbayan sa Talisay.
Hayan, pinaagi niining concentrated implementation sa usa lang ka major road, mas magmalampuson ang pagpatuman ug pagtanom sa consciousness sa mga Sugboanon sa pagsagop sa bike lanes.
Ang ako man gung nakita mao ang half-baked nga pagpatuman sa ordinansa. Sama nianang pagtugot lang sa mga sakyanan sa pag park sa bike lanes.
So, kon ako ang biker, ganahan pa ba diay ko mosubay sa lane nga dunay nagbabag? Base sa akong experience mas kuyaw na kay dunay possibility nga maigo og sakyanan ang biker kon mogawas sa lane og kalit aron paglihay.
Nganong palpak man ang implementasyon? Tungod na sa kakuwang sa political will.
ORAS
Isip compromise, mahimo man nga magtakda og mga oras ang Mandaue ug Cebu City kanus-a pwede ug di pwede nga maka-park sa bike lanes sa duha ka mga siyudad, labina sa major nga mga karsada. Kanang alas 6 ngadto sa alas 8 sa buntag ug alas 4 sa hapon hangtod sa alas 8 sa gabii maayo na kaayo na nga compromise.
Ipatawag sa usa ka tigom ang stakeholders, sama sa taxi operators, business owners nga naa sa mga karsada nga gilagbasan sa bike lanes ug uban pa.
Unya, kon Dominggo, idili ang pag park sa wholeday sa mga bike lane aron kadtong ganahan molibot sa bike lanes sa Mandaue ug Cebu City, makahimo niini nga luwas.
Unya concentrated ang pag-implement sa ordinansa pinaagi sa pagbutang og mga personnel aron sa sinugdan, mo-warn unya later manakop sa mga malapason.
Ang Cebu North Road, Imus, P. del Rosario ug N. Bacalso maoy maanindot nga mga dan diin kini pagasugdan. Hinaut pang ila kining suwayan.