Modawat karong adlawa, Hulyo 31, 2022 ang Siyudad sa Sugbo og P50 milyunes isip labing unang Annual Guaranteed Payment sa Cebu2World Development Inc. (C2W).
Ang turnover kabahin sa programa sa paglusad usab sa interim market building sa merkado publiko sa Carbon sa Dominggo sa hapon.
Sa Joint Venture Agreement (JVA) tali sa Cebu City ug Megawide Construction Corporation, diin ang C2W subsidiary, nga unang gipirmahan ni anhing mayor Edgardo Labella, sa ikalima pa unta ka tuig sila mohatag og P50 milyunes nga AGP, apan nausab kini sa "supplement" nga kausaban nga gusto ni Mayor Michael Rama.
Gitataw ni Lydwena Eco, deputy general manager, nga ang pag-usab sa probisyon sa JVA usa ka "supplement," di "curative," nga maoy buot ipalutaw sa mga kritiko sa modernisasyon sa Carbon.
Matod niya nga legal ang tanang mga probisyon sa unang JVA busa way angay nga "i-cure."
Sa unang JVA, ang Siyudad modawat lang unta og pasiunang P5 milyunes sa 2021 samtang ang P50 milyunes adto na sa ikalimang tuig, kanus-a mahuman ang unang phase sa modernisasyon sa Carbon.
Apan sa supplement sa JVA, ang Siyudad diretso nang modawat og P50 milyunes karong tuiga ug sa mosunod pang katuigan.
Sa ikalima ka tuig, ang Siyudad makadawat og P50 milyunes ug dugang 10 porsiyento kun P55 milyunes ang kinatibuk-an.
BUKSAN
Samtang gipahibawo ni C2W chairman Louie Ferrer nga buksan na ngadto sa publiko ang Puso Village ug Freedom Park karong Oktubre.
Matod ni Ferrer nga ang pagtrabaho sa duha ka mga dapit wa nalangay.