MAS matubag na karon ang problema sa kuryente sa Island Garden City of Samal (Igacos) sa Davao del Norte human nga gibutyag sa Northern Davao Electric Cooperative, Inc. (Nordeco) nga sa hinapos ning tuig 2022 posibleng mataud na ang submarine cable alang sa dugang pagpalambo sa maong electric cooperative.
Kini ang gibutyag ni Nordeco Officer-in-Charge Elvera Alngog atol sa usa ka hamubo nga press conference Dominggo, Hulyo 31, 2022, sa ilang buhatan sa Montevista, Davao de Oro.
"Hopefully, this end of the year mataud na ang atong submarine cable sa Samal Island diin by next year matagamtaman na nato ang fully-implementation niini, isip kabahin sa pagpalambo sa Nordeco maong gipaspasan nato kini kay taas-taas og demand og kuryente ang Samal," tipik sa giingon ni Nordeco OIC Alngog.
Sa bulan sa Septyembre karong tuiga, maabot na ang mga submarine cable nga gikan sa laing nasud diin ang implementasyon niini mogasto og gibana-bana nga P1.1 bilyon, suma sa opisyal.
Luyo sa pag-veto ni Pangulong Ferdinand "Bongbong" Marcos Jr., sa House Bill 10554 pabor sa Nordeco sa pagpalapad sa franchise area sa Davao Light and Power Company (DLPC) dako ang pasalamat sa naglangkob sa Nordeco ug nagpasalig sila sa ilang member-consumer-owners (MCOs) sa pagpalambo pa sa ilang serbisyo hangtud mahuman ang ilang prangkisa ngadto sa tuig 2028 ug ngadto na sa 2033.
Sa official statement sa Nordeco gipasalamatan niini si PBBM sa pagsalig sa maong electric cooperative ug pagtahod sa mandato ni kanhi Presidente Ferdinand E. Marcos Sr., sa programa sa electrification sa nasud ubos sa Presidential Decree No. 269.